New Market FC puri takok angutsü merangtsü

Kohima, September 8 (TYO): Honibarnü KTC Cup, 2017 Khriekesa FC den asayatsü aliba koka New Market FC puri küm ter tsüngda nung mezüngbuba title akoktsü asoshi merangtsü. Iba asaya ya Kohima local ground nung Honibarnü 1:30 nungi asayatsü.
New Market FC pur atema tongtibang asayamung ka tatembangsa akokbaji 2006 küm Sekrenyi League trophy akokba ya lir.
Iba sülen parnok asayamung balala nung tanabuba jenjang tashi tongtetaka tang tashi nung parnoki asayamung tongtibang kata koka mali. Parnok 2006 küm 12buba Youth Soccer Cup aser 2008 küm 18buba Royal Gold Cup nung tanabuba jenjang tongteta liasü.
Maneni New Market FC puri 16buba aser 17buba Classic Cup 2010 aser 2011 küm asayaba nunga tanabuba jenjang tongteta liasü.
New Market Football team ya 1977 küm tenzük aser Sir C.R Pawsey Trophy asayaba sülen joko küm 40 jungogo. Iba mapang nungi tenzüka iba telok ya state aser district jenjang nung tongtibang asayamung aika nung shilem agia arudar. Iba telok ajanga state team nungi asayatsüsa asayar aika nem maongka agütsüogo aser iba ajanga state nem tenüngsang aser tetushi aika bener arutsüogo.
NMYO tir Vikholie Yiese-i ashiba agi, State yimtiba nung football asayaba koba nung parnok nüngtugu lir, iba nung taoba mapang nguteta aliba jenjang tanaben meyiba bener arutsü asoshi par teloki merangtsü.
Khriekesa FC pur atema club otsü nung tang mezüngbuba takok angutsü atema maongka tajung ka ngutetogo. Khriekesa Football Club ya temaba jenjang atongtsü nükjidong yur 2017 küm kanga ajemalua tenzükogo. Lanur asayartem ajungketa wazüka ayutsüba aser konang tetushi benerarutsü imlaa parnok nem sabang tajung ka lapoktsütsü nükjidong nung iba club tenzük aser yamaji züngsem tem ajaki bendanga agüja meranga inyaktsüba imlaa liasü.
Neilakhrielie Phewhuo shiba Merima nungi lir paa football asayar ka liasü, shiba tang shishilembar ka kümogo, pai lanur tem ajungkettsü mechi nung iba club nungita teyari agütsür.
Tawa tembangba Kohima Football league, 2017 nung New Market FC aser Khriekesa FC na asayaba nung goal 1-1 agutsür tembang.
Final asayaba anogo nung Minister of Roads and Bridges, Govt of Nagaland Dr.Nicky Kire-i tetushi tesemdanger ka ama arua adentsü asoshi molunga agizükogo.
Kasa mapang nung Kohima Town Club (KTC) puri ground telungi yi bener maitsü asoshi metetdaktsüogo. Maneni KTC puri sempet agütsüba sentong nung, full sports uniform nung telok ti prongla kechi südir süaka arua adentsü asoshi metetdaktsüogo. Parnoki ano September 9 nü local ground nung KTC benjung mapang KTC puri agütsüba ID card bener arutsü asoshi metetdaktsü.