New Zealand-i Pakistan madak takok angu

Wellington, Aenjeti 19 (Agencies): Rogonü Wellington nung New Zealand aser Pakistan na tsüngda püngobuba one-day international cricket asaya nung New Zealand-i run 15 agi kokogo. Iba series nung asaya pongu tashi asayaba nung Pakistan nungeri asaya ka danga makok.
Asaya nung New Zealand puri runs 272 yanglutet, saka Pakistan nungeri over 50 nung run 256 dang yangluteter ajak out süadok.
New Zealand nunger inning nung Martin Guptill-i century ka yangluteta kanga junga asayaba ajanga par telok ajungkettsü.
Asaya tanabuba shilem tenzükli nungi Matt Henry-i ball kanga junga aonba ajanga Pakistan nunger batsman tem nem timtem agüja liasü. Henry-i mezüngbuba overs 3 aonba nung wickets 3 tashi agia Pakistan nunger top order tem out südaktsü.
Pakistan nunger run 57 dang yanglur wicket 5 tashi out sür liasü, ajisüaka Haris Sohail aser Shadab Khan na senteper run 105 yanglutetba ajanga parnok nem timla agütsü.
Tena tsüngda partnershiba ya Spinner Mitchell Santner-i Sohail out südakja raksatsü. Sohail-i atsü alema ball züktoktsü merang saka junga mezükshi Henry-i ayong ayonga pai azükba ball ajepzüka out sütsü.
Sohail run 63 dang yangluteter out asü aser pa den anidaktepa Shadab-ia run 54 dang nguteter out süadok, aser iba ajanga Pakistan nunger takok angutsü aliba timla samadok.
Iba sülen batsman Faheem Ashraf-i run 23, Aamer Yamin-i run 32 aser Mohammad Nawaz-i run 23, ta bendenloktsü. Iba mapang tashi nung Pakistan nungeri wicket 9 out sür run 249 yangluteter liasü, aser parnok atema tatembang buba overs 2 nung run 23 nüngdaka liasü.
Wickets mali ba ajanga Pakistan nunger asayatsü kanga tasak kümadok, aser asaya tembangtsüba ball 6 anunga lia Rumman Raees out asüba ajanga parnoki iba asaya makok.

You must be logged in to post a comment Login