NGT tetuyuba nung Delhi sorkari odd-even scheme thinena atar

New Delhi, November 11 (Agencies): National Green Tribunal (NGT) tetuyuba nung ajemdaker Delhi sorkari odd-even scheme thinena atar.
November 13 nungi November 17 tashi odd-even scheme benoka inyaktsü atema NGT-i telatetba ka nung ajemdaker AAP sorkar nem temelaba agütsü, saka ghonda ishika tsüngda Honibarnü Delhi transport minister, Kailash Gahlot-i sangdong ka ajanga, “NGT-i rongdak-nüngdak garitem dak alaka tangartem nembo maongka balaka magütsütsü tuyuba nung ajemdaker November 13-17 anogotem nung linük yimtiba nung odd-even scheme benoktsü lemteta aliba thinener,” ta metetdaktsü.
NGT Chairperson, Justice Swatanter Kumar-i aniba bench kati, odd-even scheme benoka inyakba mapang nung kanga rongdak nüngdak senzür garitem dak alaka ketdangsertem mesüra two-wheeler anishirtema kasa ozüng küboki aittsü tuyu.
Tamalenbo iba scheme benoka inyakba mapang nung gari anishir tetsürtem, two-wheelers anishirtem, school uniforms nung kaketshirtem amenba garitem aser kanga tongtibang nisungtembo anogo ajak nung gari senzütsü mela-a liasü.
Tanü Delhi Chief Minister aser AAP tongti, Arvind Kejriwal leniba nung cabinet senden ka amenba mapang nung odd-even scheme thinentsü lemtet. Iba senden nung Gahlot, Gopal Rai aser Imran Hussain nunger densema minister tem aden.
Tan hopta Delhi nung mopung kanga menenba nung ajemdaker Chief minister Arvind Kejriwal-i Delhi nung tang agi tasembenbuba odd-even scheme benoktsü atema apiteta liasü.
Central Pollution Control Board (CPCB) aser Delhi Pollution Control Committee (DPCC)-i NGT bench dang, tanga garitem dang nungibo two-wheelers ajanga mopung tamajungba menener, aser gari senzüba ajanga mopung menenba shilem 100 nungi shilem 20 bo motorbikes nungi adokba mokozü ajanga lir, ta metetdakja liasü.
Yakünü Aam Aadmi Party (AAP)-i November 13 nungi November 17 tashi (anogo 5) odd-even scheme tenzüktsü atema telemtetba agiogo, ta sangdonga liasü.