Ni aijang, saka nübur dang mobile banking indang sayuang: Modi

December 10, 2016 nü Banaskantha (Gujarat) kübok Palanpur nung market ka lapokja Ato kilonser,  Narendra Modi-i ‘Banas Honey’ pongdang ka sayatsüba noksa nung angur. 

Banaskantha (Gujarat), December 10 (Agencies): Tanü Ato kilonser, Narendra Modi-i opposition party tem dang, ni aijang saka nüburtem dang mobile banking indang sayuang, ta ashi.
Narendra Modi-isa, linük nung sensakertem teka tashi itshitsü atema sen tamshidak anentsütsü telemtetba ya agi, ta metetdaktsü.
Gujarat, Deesa nung lokti senden ka nung jembidang Ato kilonseri, November 8 anogo matongdangbo ajaki sen 500 aser sen 1000 notes atema dang bilema liasü, saka sen ishika denomination atemabo bilema maliasü, ta ashi.
Modi-isa, sen tamshidak anentsüba telemtetba agiba ajanga black money, ochimashi aser taila sen anema inyakogo, ta ashi.
Bharatiya Janata Party (BJP) tongti lenirisa, linük nübur, shirnok Maoists telungpur den dena liasü, tangbo parnoki surrender asür, ta ashi.
“Sen aika indang notes anentsütsü atema sorkari telemtetba agiba ajanga onoki kiralongrartem aser sen taila amshirtem tashi meiti kümdaktsüogo,” ta Ato kilonseri Modi-i ashi.
Sen anentsütsü telemtetba agiba atema opposition-i Parliament nung rongrong maneni adokdaktsüba atema aija Ato kilonser, Modi-i, “Parliament senden mekatetdaktsür; aser yimtenren nung aika ajangshia alir, Tir Pranab Mukherjee-ia senden maneni mekatetba atema mepelaba olen metetdaktsüogo,” ta ashi.
“Sorkari, onoki o tokteptsü melunga lir ta teti jembia aruogo. Lok Sabha nung jembitsü atema kü nem temelaba magütsü, anungji ni Jhan Sabha nung jembir,” ta Ato kilonseri ashi.
“Mahatma Gandhi aser Sardar Vallabhbahi Patel nunger aliba li nungi ni opposition nung aliba ozü medemertem den jembiner. Election mapang nung asenoki o kanga tokteper, ajisüaka asenok ajaki aikati vote agütsütsü ajungshir. Iba denji kasa nenokia ni anema jembitettsü, saka senotsü transactions atema nüburtem nem banking, aser technology koma amshitsü’ar sayuang,” ta ashi.
Nüburtemi sorkar telemtetba nungitba atema pelar, ta pai nüburtem dang pelaba lemsatep.
Ato kilonserisa, iba tensa ya anogo 50 tsüngda tashi nungbo süngjemtsü, ta shia nüburtem dang iba telemtetba maneni nungittsü ajungshi.