Ni Europe-i kü mulungka nung dang aotsü: Gurpreet

Bengaluru, Aenjeti 9 (Agencies): India nunger asayar rongnungi Europa League nung asayar, Gurpreet Singh Sandhu kicha lir, saka pai ashiba agi, Bengaluru FC-i pa asayaa aliba Norwegian club Stabaek FC dang nungi sen timba agütsür.
“Nüburtemi ni Norway club nung asaya ajanga sen timba aar ta bilemer, ajisüaka aji shidak masü. Ni Indian Super League nung sen timba aaer,” ta Gurpreet-i ashi.
“Linük nung ni-a süang mesera football asayar tangartem ajaki India nung temaba jenjang nung Cricket asayartem nem IPL nung asayaba atema sen crore 16 nungi 17 tashi agütsüba ama aginer,” ta Gurpreet-i ashi.
Gurpreet-i ashiba agi, pai akhangba tem peritsüra pa Europe nung meyipa oa asayatsü.
“Ni Europe-i aodang kecha term meyanglu. Ni bilemba ajak agi kü asaya nung terenlok bener arutsübaji dang liasü. Tangbo ni international jenjang nung tajangshiba terabo nguogo aser ni tanaben Europe nung oa asayatsüsa maongka ngura, kü indang term nung dang aotsü,” ta pai ashi.
India-i meyipa aruba indang kuli asüngdang dang Gurpreet-i ashiba agi, pa asayatsüba atema maongka mangur.
“Anungji ni tanga lenmang ka bushitsü asoshi mulungtet. Kü tejangrabajibo Europe nung asayatsüba liasü saka ibaji tamakoktsü liasü,” ta paisa ashi.
“India-i meyipa arutsüba atema telemtetba agiba ya kü atema kanga tasak liasü. Bengaluru FC den asayatsüba ya kü asoshi maongka tulu lir, kechiyong taoba küm pezü pongu tsüngda iba team ya India nung team tajungtiba lir,” ta pai shisem.
Sunil Chhetri aser bendanger asayar Miku aser John Johnson nunger den külemi asayaba indang asüngdang dang Gurpreet-i ashiba agi, pa taoba küm tenet tashi Sunil den asayaogo aser pa dak team asaya tasak asayaba mapang nung len anitsü asoshi tashi lir.
“Bendanger asayartem ya temaba jenjang nung lir. Miku, Paartalu aser John Johnson nunger den asayatsü asoshi maongka anguba ya onok atema kanga tia taka lir, aser India nunger lanur asayartem parok den külemi asayaba ajanga tajangzük aika angur,” ta paisa ashi.
ISL nung asayaba indang jembidang Gurpreet-i ashiba agi, par team takok aser tamakok ajangshia aruogo, saka tang temaba jenjang nung lir aser temaba jenjang pezü nung züngsemtsü imlar.