Ni menden metoktsütsü: Benjamin Netanyahu

Tel Aviv, Tsüklai 14 (Agencies): Süpokrem amshiba, temulung melemtettsüsa tiazü mapa inyakba ken o nung aitsütsüla, ta police temi ashiba ya tim masüba mapa lir, ta Israel Ato Kilonser, Benjamin Netanyahu-i ashi.
Israel nung right-wing telok nungi lenir ya police temi ken o balala ana nung “1,000” aser “2,000” nungja agütsür bushisüngdangba mapang lir aser item ken o nung pa aitsüra tepuokdaki yoktsü.
Israel nung taoba Ato Kilonser, Ehud Olmert ya mapa shidang meinyakba ajanga 2012 küm aija küm trok tepuokdaki yok.
Netanyahu anema mezüngbuba ken o ya sen $300,000 jenjang sempet ka pa aser par kibong nem yimten yimsüsüba tsütsü teyari angutsü mechi agütsüba lir.
Tanabuba ken o nung Netanyahu-i linük nung osangkaket tulutiba, Yedioth Ahronoth nem parnok den tokteper, Israel Hayom mepelatsüsa temzüng yanglutsü aser iba yongji osang tajung dang adoktsütsü tezüngzüktep ka agitsü merang, ta police temi aitsür.
Netanyahu-i iba taitsüba ya aiben magizük aser Rasemnüa pa tasü ita nokdaka par sorkar ya ajak den kasa dang liasü, ta ashi.
“Ozü teloktep sorkar shidak dang lir. Election agitsü asoshi shinga sentong mali, nia mali,” ta Netanyahu-i Tel Aviv nung osangbener dang ashi.
“Ochi ji temai adoktsü aser iba atema kecha malitsü,” ta pai ashi.
Netanyahu tarutsü jenjang ya pa indang yimten yimsüsüba nung tembartemi telangzüba agütsüba nung keta lir, ta osangbener kati West Jerusalem nungi ashi.
“Pa indang Likud party nung alirtem pa den akhang akhanga nokdaka lir, aser pa abelen Israel yimtenyimsüsür teloki longjemer pa aitsür,” ta osangbener Harry Fawcett-i ashi.
“Saka tongtibangtibaji par teloktep sorkari nung kechi asütsü. Netanyahu ya right-wing teloktep sorkar nung lir aser tang tashi nung iba telok nung züngsem tejen anati tera temelenshi aliba sayur,” ta Fawcett-i ashi.
“Finance minister, Moshe Kahlon-i, iba ken o ya attorney general-i telemtetba agiba nung keta lir, ta ashi aser pai iba dak alaka kicha mashitsü, ta shisem. Saka Education minister, Naftali Bennett-ibo, Netanyahu-i Israel lenir ka ama melitet, ta ashi. Israel nung obendangertemi tai ya kuli tejangja mongutet tashi tai make tama bilemer, saka pai police dak temulung alemer,” ta osangbener-isa shisem.
“Netanyahu ya ochimashi aser lendong aketba lenir ka lir,” ta Israel parliament nung Palestine nunger political party, Joint List nung tekolakba, Ayman Odeh-i Sangtennü ashi.
“Netanyahu kidangi aotsüla,” ta pai Twitter nung zülutsü.