Ni tai kecha meinyak: Jacob Zuma

Pretoria, Tsüklai 14 (Agencies): Mangatettep agi sünga alisang aser South Africa Tir Jacob Zuma-i ashiba agi, pai tai kecha meinyak aser menden nungi alutsü asoshi kuli kecha mangur.
Rasemnü tashi nung menden toktsütsüla mesüra Yangtepnü parliamentary vote of no confidence agitsü, ta South Africa sorkar aniba telok, African National Congress (ANC)-i anogo züngzüka yutsüba sülen Zuma-i jembi.
Ochimashi maparen nung aija arishi küm 75 tain, Zuma ya tir menden nungi alutsüla, ta akhangba mapang ka lir.
Saka pa linük nung menden temaba nungi alutsüsa ANC-i kuli tejangja magütsü, ta pai ashir.
Jelia mesangdongi national broadcaster, SABC den sensaksemba mapang, Rasemnü par tembar, takataiter India nung soa intetsang, Gupta’er kidang police temi mita bushiba aser Gupta apuba indang Zuma-i mashi.
Yimtenren nungi tajangzük angutsü mechi Gupta-i tir den temba ayimba maongka amshi, ta Gupta ya aija lir. Saka telok anapronglai aibelen mapa kecha meinyak, ta ashir.
Zuma-i ANC den metokteper saka pa mapa toktsütsü asoshi telemtetba agiba magizükteter, ta ashi.
“Iba ken o adokba ya kü asoshibo tim masü. Shinga-ia kuli magütsü. Ni inyakba shinga-ia shia mali,” ta pai ashi.