Nisung 26 kotaki ao saka Devin Kelley-bo molumii ago: Anne Graham Lotz

Texas, November 9 (Agencies): Sutherland Springs, Texas nung First Baptist Church nung tepsetba nisung 26 Kotaki anir ogo saka parnok tepsetsang Devin Kelley-ibo tia balaka ajuruogo, ta Billy Graham’er jala aser evangelist Anne Graham Lotz-i ashi.
Arishi küm 69 tain Lotz-i Facebook post ka nung iba osang lemsatepdang Yohan 3:16 nung ajemdaker la indang tebilemba ashi.
“Baptist pastor temi arogo tilatem nung aser talisa Texas nung kanga dang tamang kaa mapa inyaker. Anungji, First Baptist Church of Sutherland Springs nung asüba tamanger 26 jagi Osangtajung aiben angashidanger alitsü ta ni amanger. Parnoki Yisu Khrista dak amangba ajanga Tsüngrem den tesentaktep tajung yua liasü ta ni amanger aser iba jagi November 5, 2017 nü parnok Deobarnep tenla kidang liasü.”
“Tasür 26 aser teyirurtemji Pa külemtsü, sarasademtsü aser talila angazüktsü atema adenshiba liasü. Anungji, parnok injang agi khasetsang, kotak tenyartemi parnoki Kotaki anir ao aser idangji Tsüngremi parnok menürema agizük aser Yisu-i azüit” ta Lotz-isa shisem.
“Ajisüaka, nisungtem khasetsang Devin Kelley-ibo tia balaka ajuru. Nisung 26 tepsetba sülen mapang tatsüka lir nisung ka akümli nungi pila saka pabo Kotaki matu. Pai teti tammang alidak, rongjensetdak, timtem, tekangshi aser Tsüngrem jak kodanga manguba tesem kati ao. Ni obendanger ka masü saka Devin Kelley molumii aobaji tejangja” ta laisa metetdaktsü.
“Na iba lima nungi pila aoba sülen kechi atongtsü. Laishiba nung asenoki teti alitsü atema aotsü tesem ana tejangja shia lir. Anungji nü tarutsü atema telemtetba agitsübaji tanü ya mapang tajung lir. Nenoki iba atemaji bilemdangang aser telemtetba ka agiang. Sutherland Springs lendong nungi asenoki angazüktsübaji na aser ni-i iba akümli toktsür kodang aotsü’ar memetet ta asüba lir. Anungji, tang nungi renemang. Yisu Khrista nü Kümtetdakba aser Tsüngrem ta agizükang aser ibaji asü nungdang na Kidangi aotsü” ta Lotz-isa ayongzük.