Nisung kar asalentong nung Maldives kangshir : Yameen

Male, Tsüklai 08 (Agencies) : Maldives nung sorkar atsüngdoktsü nükjidong nung sen million dollar aika süpokrem agiba atema police-i obendanger tazüng ana aija lir aser tang linük nung yamai melangmapu adokdaktsüba ya nisung kar asalentong lir, ta Maldives Tir, Abdulla Yameen-i jashia metetdaktsüogo.
Democratic yimya nung election agia shimtetba Tir, Mohamed Nasheed pa menden nungi 2012 küm atsüngdokba sülen asetkong linük nung yimten tebilemtsü aiben ajangshia arudagi; ano tang puoka aliba opposition lenirtem chiokang, ta supreme court-i taoba Yangtepnü ozüng agütsüba sülen tensa kanga mejungi kümogo.
Court-i lemtettsübaji Yameen-i aniba sorkari manger aser tang linük ajungalen ’emergency’ alitsü osang sangdonga lir.
Yameen-i ’emergency’ atema ozüng agütsür ghonda ishika sülen Maldives Supreme Court nung Chief Justice Abdulla Saeed aser obendanger ka tenüng agi Ali Hameed pua lir.
Osang benertem den jembidang Acting police chief Abdulla Nawaz-i ashiba agi, Saeed o Hameed na aser court official, Hassan Saeed nungertem nem süpokrem sen million dollar aika agütsüba kuliji parnoki jangjaogo.