Nisung kari India lemsatsü meranger: PM Modi

New Delhi, Aenjeti (January) 12 (Agencies): Nisung kari linük nung telemsa adokdaktsünür saka lanurtemi parnok noktangtsü ta Prime Minister Narendra Modi-i ashi.
Rogonü (Hokolbar) National Youth Day aser Sarva Dharma Sabha sentongtem nung o jembidang Modi-i iba olen ashi.
Swami Vivekanand tasüba anogo bilemtetbamung nung Modi-i “West len India anema olulu aika liasü saka Swami Vivekananda-i item ajakji tiyazü ta kuli sayu aser pai lokti nung temenentem anema ola adok” ta ashi.
Iba sentong nung Modi-i video conferencing ajanga jembi aser idangji pai tesentepertem dang New India alizüng atongtsü atema mapa inyakang ta ayongzük.
Taruba küm ana tsüngda India kübok yimtsüng ajak nung kima nung metsümeshiba malitsü atema meranga inyakang. India nung kima nung metsümeshiba inyakyim agiendi aser ‘Ek Bharat Shrestha Bharat’ tongteta Swami Vivekanand indang alizüngtem tongdaktsüdi, ta paisa ashi.
Tanü Modi-isa Greater Noida nung aliba Gautam Buddha University nung 22 buba National Youth Festival sentong nung o jembi.
Tanü lanurtem ya mapa adokdaktsürtem asütsüla aser ibaji atema sorkari parnok yaritsü mulunga lir, ta Modi-i ashi.
“Nenoki shisabulua tebilem, tejakleni aotsü merangang aser mezüngbuba mera agiang. Sorkar nenok den lir” ta pai lanurtem ayongzük.
Centre-i inyakba Mudra scheme, Skill India aser Startup India fund atema Modi-isa ashiba agi, “lanur entrepreneur temi tangar dang nungi alia inyaktsü aser langka tasen tenzüktsü atema sabang peria lir.”