NNC-i ya Naga nunger ajak atema sabang ka lir: Adinno Phizo

NNC-i ya Naga nunger ajak atema sabang ka lir: Adinno Phizo

Tsüklai 2, 2018 nü Chedema Peace Camp nung 73 buba NNC formation Day nung NNC president Adinno Phizo, FGN president General (retd) Viyalie Metha aser tangartem külemi agiba noksa angur.

Kohima, Tsüklai 2 (TYO): NNC ya political party mesüra telok ka masü saka iba ya Naga nunger ajak atema sabang ka lir ta tanü Naga National Council (NNC) president Adinno Phizo-i ashi.
Chedema Peace Camp nung 73 buba NNC Formation Day amungdang Adinno-i iba osang metetdaktsü.
“1947, Luroi 14 nü alima dang asen nüjiso metetdaktsü, iba nung Naga nunger aliba tesem ajak densema liasü. British nungeri toktsür maodang Manipur telongtet nung aliba Naga tesemtem dang Nagaland nung adentsü jaok saka iba mapang parnok lennirtemi memulung aser parnok yamaji dang alitsü ta ashi. Tanü parnok kari aibelena mapa inyaker saka tanüngba Naga nungertemi angajemer mulungteptsüla” ta laisa ashi.
Naga putiotsü nung teratatsü kecha mali, Naga nungertem ya India nunger masü aser Nagaland ya India litsü masü, ta Adinno-isa shisem.
India nüjiso angutsü anogo ka lia par Constituent Assembly nüboi mezüng atema Kohima semdang aser NNC den ajurutep. Idangji pai Indian Union nung adentsü mepishi saka NNC-i magizük. Ibaji linük ana tsüngda tetenzükba liasü aser iba nung teratatsü kecha mali, ta laisa metetdaktsü.
Tesüiba küm 72 tashi asenok sasa asen linük renlokdaktsütsü melena asenoki India anema asen linük kümzüka arutsüsa tensa ajuru. Iba mapang India-i asen nübortem yimtsüng nungi samatsütsü merang, yimtsüngtem mitsü küma rongdoktsü saka Tsüngrem taochi ajanga yimdaklirtem tanaben pei talidaki arur yimtsüng kümtetdaktsü. Anungji asenoki parnok nem tenüngsang agütsütü tim. 1954 nungi 1964 tashi Naga nunger India sepaitemi kanga mejunghi reshikangshiogo saka Tsüngremer sayatenya mapatem ajanga asenok linük ka ama noktaktetogo, ta Adinno-isa ashi.
Tanü Nagaland nung maneni Indian army lir, India sorkari Luchii 30, 2017 nü ita trok atema Armed Forces Special Powers Act of 1958 (AFSPA) alitsü mapang atsülangogo. Ibaji election agitsü atema lir, 1958-2018 tashi Nagaland nung iba tensa ajurur aser ibaji Naga nunger tanüla samatsütsü atema lir.
India-i shinga litsü nung tenük meyoker ta tawa tu India Prime Minister, Narendra Modi-i shiogo aser ibaji parnoki Nagaland yakta toktsür aotsü ta ashiba asütsü ama imlar,
Tanü sentong nung mendenji NNC joint secretary Acüyi Vadeo liasü, Rev. Dr. Kevekhalo Lasuh-i Lai zünga sarasadem, Sumi Baptist Church Kohima aser Chakhesang Baptist Church Kohima-i ken ajanga shilem agi, FGN Tatar Hoho speaker Lhouvitsu-i o tatsüka jembi aser FGN president General (retd) Viyalie Metha-a aden.

You must be logged in to post a comment Login