North Korea-i nuclear noknü tekeraba nung yanglutsü nangzük

Seoul, September 13 (Agencies): Tawa North Korea-i nuclear bomb tesashi tendangba ajanga United Nations Security Council-i par linük nem tenokdangba tesashi agütsü, saka North Korea-i iba noknü yangluba sentong tekeraba nung renolka aotsü, ta Bodhbarnü nangzük.
Tawa tendangba bomb ya hydrogen bomb tila ka lir aser missile nung inoktettsü, ta Pyongyang-i ashi saka US nung aliba 38 North website ajanga ashiba agi iba bomb tuozük ya kilotons 250 lir aser iba ji asadangra 1945 küm Hiroshima nung pokloktsüba bomb tesashi dang 16 ben agi tuluba lir.
July nung Pyongyang-i intercontinental ballistic missile ana tendangba sülen anu tawa tendangba bomb ya Pyongyang-i nuclear bomb tendangba trok buba lir aser iba ajanga alima ajungai North Korea aitsü.
UN Security Council-i Hombarnü North Korea nem tenokdangba 8buba agütsü, koba nung North indang textile osettem linük katia malitsü aser iba linük dang totzü mayoktsü shia lir, aser iba tenokdangba ya okila ama lir, ta US Tir, Donald Trump-i ashir.
July ita North Korea-i ICBM tendangba ajanga linük katia North den coal, lead aser tzüyim nungi adokba chiyongtsütem nung shishilemba masütsü tenokdangba UN-i agütsür ita ka dang lir anu tenokdangba tasen ya agütsü. Mezüng bo US-i tenokdangba ya kanga sashia benok saka China aser Russia indang teyari agitsü aoshi tenokdangba kar ajemtsü.
Hombarrnü UN-i tenokdangba tasen agütsüba ya US-i North Korea nung nüburtem lensettsü nükjidong nung inyak aser iba inyakyim ya kanga sashia aitsür, ta North Korea indang Foreign Ministry ajanga ashi.
Iba ya anu temzüng alema tenokdangba nung temenen indang temzüng inoka US-i anir yanglu, ta KCNA ajanga sangdong.
“Linük temeden aser nisung alitsü temeden kümzüka ayutsü atema DPRK-i tashi tuluba akümtsü asoshi tali temolung agütsür inyaktsü,” ta ministry ajanga sandong.
“UN Security Council indang temzüng nung North Korea-i iba ama telangzüba agütsüba ya jenjang maket ka lir,” ta South Korea indang unification ministry ajanga ashi.
North-i nuclear tendangba nung telangzüba agüja South-ia meta talang Taurus missile live-fire exercise agiogo, ta Air Force-i ashi.
South Korea linük tiyong nungi khaloktsüyonga German indang air-to-surface noknü yaki North Korea indang tongtipang tesem tem nung kongshitettsü, ta Air Force-i shisem.
Iba ama tenokdangba tesashi agütsüba ajanga North Korea-i noknü yangluba sendong nung obang kati arua tembangtsü ajungshitsü, ta US aser par tembar linüktemi ashir.
Nuclear noknü yangluba sentong ya US mitkartem nungi parnok kümzüka ayutsü atema lir, ta North Korea-i ashir aser Kim Jong-Un lenisüba nung Pyongyang indang nuclear noknü sentong kanga kera renoloker, ta teshisadangertemi ashir.
Tawa omb tesashi tendangba ajanga Washington-ibo North Korea lenir Kim indag rongsen bendang lima nung yua aliba ajunga sota ayutsü tebilemba liasü.

You must be logged in to post a comment Login