North Korea nem tenokdangba agütsütsü asoshu US-i mepeshir

Washington, September 09 (Agencies): China aser Russia-i nokdakaka North Korea nem United Nations Security Council ajanga Hombarnü tashi nung tenokdangba anu tesashiba agütsütsü asoshi US-i ajungshir.
Washington-i draft UN resolution ka yanglua benokba nung North Korea nem linük katia totzü magütsütsü, lenir Kim Jong-un indang rongsen sottsü, textile mayoktsü aser North Korea nunger tanga linük nung mapa inyaker nem taa agütsüba anentsü shia lir.
UN Security Council nung züngsem 15 Hokulbarnü senden amenba mapang Russia aser China-i textile nokdangba dak alaka tanga tenokdangba ajunga anema nokdak, ta osang ka ajanga ashi.
“North Korea nem tenokdangba tali agütsütsü asoshi temzüng yanglutsü atema Hombarnü, September 11 nung senden jazüka vote agütsüteptsü tebilemba lir, ta United States-i UN Security Council nem tanü osang ka agütsüogo,” ta UN nung US mission indang sangdong ka ajanga ashi.
Saka iba sangdong nung ya koba tenokdangba nung vote agütsüteptsüar shia mali.
Linük ajungai tenokdangba agüja liaka Honibarnü North Korea nung linüki tenzükba anogo amonger aser iba mapang anu meneni nuclear aketba noknü yanglur, ta osang sangdong.
“Defence sector ya rongsenketsüng aser nuclear noknü mapang ka nung renloktsü asoshi yangluba sentong, Byungjin policy den külemi pei sasa pei dak temolung lemtettsüsa raraba noknü timba yanglutsüla,” ta Pyongyang nung aliba Rodong Sinmun osangkaket ajanga ashi.
North Korea-i taoba küm September 9 nung nuclear bomb pongububa tendanga liasü aser trokbuba ya taoba hopta tendang aser iba ya hydrogen bomb ka koba missile nung inoktsü akoker, ta ashi aser iba ajanga alima ajunga nungi iba linük aija tenokdangba tali agütsütsü ajungshir.
July ita nung Pyongyang-i intercontinental ballistic missiles (ICBMs) ana tendang aser iba missile ajanga US linük tongtettsü südi, ta amanger.
Iba ICBM tendangba ya US nung tamachi nisungtem asoshi sempetlep lir, ta Kim-i shia lir.
Mijang, yin aser angu tem North Korea nungi belena ayuba nung tenokdangba agütsür ita ka sülen September 3 nung nuclear tashi tuluba tendangba ajanga UN Security Council nung züngsemtemi Pyongyang merenshitsü asoshi anu asadanger.
Russia aser China nati anema nokdakaka US-i anir yangluba temzüng tasenba ya mapa küma inyaktettsü südi, ta diplomats temi ashir.
Totzü aser totzü densema yangluba oset balala nung tenokdangba agütsüba ya tesashiba asütsü südi, ta osang ka ajnaga ashi.
North Korea nem tenokdangba tasen agütsütsü asoshi Security Council nung vote agütsütsü atemja jembitsü asoshi kanga kerar, ta Russian Foreign Minister Sergei Lavrov-i ashi.
“North Korea indang nuclear aser missile sentong anema par linük senzüka yutsütsü aser tenokdangba balala agütsüba ama iba linük den ken o tim lenmang agi lemsatepa jembitsü sentong yanglutsüla,” ta Lavrov-i ashi.
North Korea nunger linük balala nung mapa inyakertem tanaben par linüki meyiba yoktsü asoshi sentong renemba anema Russia-i nokdaker, kechiaser parnok ya Pyongyang rongsenketsüng nung tongtibang lir.
Pyongyang-i nuclear aser missile tendangba ya anena langbang nung arua jembitsü asoshi US-i tenokdangba ya agütsünür.