NOTA Votes

Alima nung election inyakyim nung NOTA benshiba linük 14bubaji India linük asütsü. 2013 küm Supreme Court tetuyuba nung ajemdaker India nunger election inyakyim nunga ‘None of The Above’ (NOTA) option benokba sülen küm asem-pezü tsüngda Lok Sabha election ka aser state assembly election aika agia arudar, aser tang tashi nung NOTA votes timtiba agutsübaji state ji 2015 küm Bihar Assembly election nung NOTA votes shilem 2.48 lir, aser tanabuba jenjang nung tawa agiba Gujarat Assembly election nung NOTA votes shilem 1.8 liasü. Gujarat election nung nisung lakh 5.5-i NOTA votes agutsü; iba tetezü Gujarat nung vote agütsür shilem 1.8 atemabo candidate tetemsü maliasü. NOTA votes timtiba agütsüba tasembuba aser pezübuba jenjang nung Puducherry (votes shilem 1.67) aser West Bengal (shilem 1.53) lir. Ano yaküm Assam Assembly election nunga nisung crore 1.7-i NOTA votes agütsü, aser ibaji shilem 1.12 liasü. Yamaji Election Commission-i Nagaland nung assembly election agitsü atema anogo sangdonga taruba ita election agi ka asübo, aser nüburtemia nübo tetemsü maliba constituency tem nungbo NOTA votes agütsü nungbo asen state nunga NOTA votes ji aika asütsü südi ta bilemer. 2013 küm NOTA option ya Chhattisgarh, Mizoram, Rajasthan aser Madhya Pradesh elections nung mezüng amshi, iba sülen nungi tenzüka assembly elections nung pei constituency nung candidate tetemsü melira NOTA nung vote agütsütsü atema ajungshitepa arur. Kechiba NOTA votes agütsütsüla? Tawa Gujarat election nung assembly menden 182 nungi menden 115 nungbo NOTA votes ji tasembuba jenjang nung liasü. Ano menden 30 nungbo NOTA votes ji takok angur candidates votes dang nungi timba liasü. Item menden 30 nungi BJP-i menden 15, Congress-i menden 13 aser Independents candidates-i menden 2 nung takok angu. Iba tetezü NOTA ajanga item menden nung shilem tulu agiogo. NOTA option mali asübo item votes ji takok angur candidate, tanabuba jenjang angur candidate mesüra tamakok angusang/angula candidate-i ngur lila. NOTA votes ajanga constituency nung nüburtemi lenirtem dak melung asüba mesüra melung masüba asadangteter. India nung election inyakyim nung NOTA option tenzüker sülen yimtenren mongintemi asadangetba agi- NOTA votes kanga bulua agütsüba tesemtemji- Maoists telungpurtemi timtem agütsüba tesemtem, sorkar dang melung masüba tesemtem, Congress aser BJP tsüngda kanga atongtepa toktepba tesemtem nung liasü ta asadangtet. Oda nai ner constituency menden nungi tokteper candidate tem rongnung ka danga shimtsüsa nübo mali ta bilema nai vote agütsüi moura ibaji tim masütsü, ajisüaka nü tim temeten amshia nai NOTA votes agütsüra iba jagi asen state nung yimtenren aser lenirtem asadangba inyakyim nung ajangzüktsü.