Nov 17-18 nung Nagaland job mela akatsü

Dimapur, November 15 (TYO): Naga nunger lanurtem nem mapa agütsütsü nükjidong nung state sorkari ayongzüka November 17-18, 2017 anogotem Agri Expo, 4th mile, Dimapur nung anogo ananü Nagaland career workshop aser job mela akatsü.
Anogo ana sentong nung nija sector balala nungi nüngtugu National company temi tetemsü candidate tem shimteta state adener tangalen mapa balala agütsütsü; mezüngbuba anogo nung interview skills workshop akatsü aser tananü recruiting agency temi mapa balala atema interview agia direct appointment agütsütsü.
Nagaland career workshop & job mela sentong ya Directorate of Employment, Skill Development & Entrepreneurship, Govt of Nagaland den Ministry of Labour & Employment, Govt of India-i ayongzüker.
Labour, Employment (Skill Development) Parliamentary secretary, Neiphrezo Keditsu-i, iba job mela ya Naga nunger lanurtem atema maongka tajung lir, anungji ajaki iba maongkaji agidaktsüner, ta ayongzük.
“Asenok dak tashi tulu lir, ajisüaka kuli kar ajanga mapa tetemsü atema nisung tetemsü shimtsü makoker,” ta paisa ashi.
“Job mela ya ajanga zünger mapa mengui alirtemi mapa angutsü imlar; kodang state adener tangalen inyaktsü atema asen lanurtem shimdir, parnok kümzüka alitsü atema sorkari nendaka inyaktsü,” ta paisa metetdaktsü.
Quality Skill Development Principal Consultant, Aditya Baran Mallik-i linük nung nüngtugu recruiting company temi maparen balala atema tetemsü candidate tem shim,tsü, iba maparen nung shinga tiyongtsüi aita meinaktsü mesüra taila company mali, ta metetdaktsü.
Employment, Skill Development & Entrepreneurship Director, Muthingnyuba Sangtam-ia, e-registration dak alia tejangrartemi job mela mapang nunga registration agitsü akok, ta metetdaktsü.
Employment Exchange report ajanga ashiba agi, taküm July ita tashiu nung mapa mengui alir tenüng züloka alir lanur 72,000 tashi lir.