November 26 nü Mann Ki Baat atema PM-i onüktem meshir

New Delhi, November 18 (Agencies): Honibarnü Ato kilonser, Narendra Modi-i November ita atema ‘Mann Ki Baat’ sentong nung jembitsü asoshi linük nüburtem dang tebilemba onüktem meshiogo.
‘Mann Ki Baat’ ya ita shia tatembangbuba hopta nung denjiba Deobar anogo nung Ato kilonser, Narendra Modi-i linük nüburtem den onük balala nung ajemdaker jembiba radio sentong ka lir.
“Tan ita Mann Ki Baat sentong Deobarnü- November 26 nü akatsü, iba atema nenok tebilembatem kechisa lir, ibaji lemsateptsü akok. Nenoki tebilemba onüktemji Narendra Modi Mobile App. http://nm4.in/dnldapp ajanga kü den lemsatepang,” ta tanü Ato kilonseri twitter ajanga mepishia metetdaktsü.
“1800-11-7800 dial süang aser Mann Ki Baat atema message record sünag. Nai MyGov open forum nunga zülutettsü akok aser tan ita Mann Ki Baat atema tebilemba onüktem lemsateptsü akok,” ta Ato kilonserisa ashi.
MyGov website osang ka ajanga, “Modi-i teti inyaka aruba ama nai aginüba onüktem den pai pa tangatetbatem aser onüktem lemsateptsü jangrar,” ta metetdaktsü.
Kasa osang ajanga, “38buba Mann Ki Baat nung jembitsü atema Ato kilonseri nenok nem nenok tebilemba onüktem lemsatepdaktsüner,” ta ashi.
“Nenoki nenok tebilemba onüktem mesüra Ato kilonser nem jembidaktsünba onüktem onok dangi yoktsü akok. Hindi mesüra English oshi nung nenoki nenok osangji record süjang. Nenoki record sür yokba osang karbo Ato kilonseri jembiba nungji adentsü akok,” ta kasa website ajanga metetdaktsü.
Website ajangasa nüburtem dang 1922 nung missed call agüjang aser SMS anguba linük ajanga Ato kilonser den pei tebilemba onük lemsatepang, ta metetdaktsü.
Taoba ita Mann ki Baat sentong nung Ato kilonseri, India ya alima atema yimjung osang sangdonger ka lir, India linüki mapang ajak nung UN Missions ajanga alima nung yimjung, telongjem aser tesünep atema inyaker, ta jembia liasü.
U.N. peacekeeping missions nung nübo timtiba yokba tasembuba jenjang nung India lir; India-i alima tesem ajaklen mission balala atema security sepai 7,000 yoka lir, ta paisa ashi.