NPCC-i Mokokchung jila nung District Tour sentong agi

Dimapur, September 13 (TYO): Bodbarnü Mokokchung jila nung NPCC-i District Tour Programme Public Meeting ayongzüka agi. Iba sentong nung public den Ungma, Khensa aser Mokokchung Village Council tem aden, ta Media Cell, NPCC-i sangdong ka nung metetdaktsü.
Senden nung NPCC Tir, K. Therie-i o jembidang, NPCC-i tour programme ya communalism, ochimashi aser sorkar ketdangsübaren majungba nung lendong keta aliba osang metetdaktsüts atema ayongzüka agir, ta ashi.
BJP indang Hindutva tebilemba ajanga linük nung tamangba yimsütem tsüngda telemsa adokdaktsütsü dang masü saka Khristantem aser telok tilatem reshikangshiba atema bendang linüktemi India den tesentaktep pilaogo. BJP-i maremzükba ajanga linük tesem balala nung nisungtem asür aser nashi anükertem o BJP pusemba teloktemi nisungtem tepseter, ta K. Therie-isa shisem.
PM Narendra Modi ji pungmang pungmanger nisung ka lir aser pai linük dang nangzükba ‘acche din’ marur saka linük rongsenkettsüng jenjang kanga majung kümogo. Modi-i demonetization inyakba ajanga rongsenkettsüng jenjang mejungi kümdaktsüba sülen, tang petrol, diesel aser cooking gas (LPG) dena petroleum products ajak nung subsidy agütsüba agiener. Ano, paisa saru talila sarur, BJP indang sentongtem ajanga nübortem timtemteper, ta NPCC president-isa metetdaktsü.
Taruba Lok Sabha Election nung BJP sorkar atsüngdoktsü atema yimten telok 17 longjemer tokteptsü, ta paisa ashi.
Naga nunger len anitsü atema Aor lennir tajungtem adokba atema Therie-i Aor dang pelaba metetdaktsü.
Taruba election nung tokteptsü atema temulung lemtetba nübotem dang shimtsü, anungji Mokokchung district nung alirtemi, Assembly aser linük nung Naga nunger atema ola adoka jembirtem ang shimtsü ayongzüker, ta Therie-isa ashi.
NPF-i aniba DAN sorkari küm 15 tashi sorkar ketdangsübaren nung tim mesüi inyaka aruba den tawa parnok party melenshiba indang olen ka jembidang, NPF nem maneni tashi agütsüra, state tamajungba kümdaktsütsü, ta NPCC Tir-isa metetdaktsü.
Indira Gandhi sor küm 100 ajungba benjungmung indang jembidang Therie-i ashiba agi, “Indira-i tebu Jawaharlal Nehru dang nungi Indo-Naga yimten tebilemtsü angazük aser lai prime Ministerial jenjang nung Naga nunger lennirtem den trokben tashi olemtep.”
Congress-i telemtetba angutsü ta amanger aser Congress-i 1972 küm Pfütsero nung NNO indang telemtetba nung nokdaker, ta NPCC President-isa ashi.

You must be logged in to post a comment Login