NPF-i Naga nunger atema maneni inyaktsü

Dimapur, Tsüklai 13 (TYO): 1963 küm Nagaland state tentetba aser 1964 nungi regional party tenzükba sülen nungi Naga People’s Front-i Naga yimten latettsü atema tongti süa inyaka arur aser iba tangatetba nung noktaka lir, ta NPF Tir Dr. Shurhozelie Liezietsu-i ashi.
“NPF party-i Naga yimten timi latettsü atema mapa aika inyakogo aser iba alizüng matong tashi maneni inyaktsü” ta tanü Minister Y Vikheho Swu atema nübo ayimba sentong ka Dr. Shurhozelie-i ashi.
Y Vikheho ya 13 buba Pughoboto AC nungi NPF candidate ka ama tokteper aser tanü Pughoboto Local ground nung sentong ka ayonga agi.
NPF ya Naga nunger atema lir aser Naga nunger ajungtsü atema dang inyaktsü. 12 buba Nagaland Legislative Assembly nung khuret ka madak ka ajurua aru aser iba jagi terenlok mapa aser Naga yimten tebilemtsü dak sendakba mapa aika meinyaktettsüsa aküm, ta Dr. Shürhozelie-isa ashi.
Naga lennir kari tashi aser sen penpua arshidang NLA nung khurettemji ajuru aser lennir aika shiruru anishir ama tesem ka nungi kati belenshia anir senzü, ta paisa ashi.
“Tangbo NPF party nung tenendak aser bendanga agütsüba MLA kar den candidate tasen aser nübo tajungtem dena lir. NPF nem sorkar akümtsü tashi agütsüra Naga nunger atema mapa tasen aika inyaktsü” ta NPF tirisa shisem.
NPF party ya Naga nunger indang aser iba ajanga Naga nunger maitsü sayur. Ajisüaka, BJP ya National party ka lir aser India tongtiba indang party ka lir, anungji Naga nungertemi Naga nunger atema noktakba party zübazüba bendangtettsü. Asenoki politics inyaker saka asenoki asen tamendakdak aser maitsü mamali, ta Dr. Shürhozelie-isa ayongzük.
NPF-i tesüiba küm 14 tashi BJP den tesentaktep yur inyaka aruogo saka parnok den menden lemsatsüba nung memulung, kechiyong iba nungi tajung madoktsü ta NPF-i meteta liasü. NDPP-i BJP nem menden 30 agütsütsü nangzük saka tatem nung parnoki menden 20 agütsütsü telemtetba agiogo. NDPP-i BJP den menden lemsabaji Naga nunger yoka chir tashi angutsü atema dang lir, ta paisa ashi.
Iba sentong nung Minister & NPF candidate, Y Vikheho Swu-ia o jembidang, NPF party ya political party ka dang masü saka Naga nungeri shimtetba political party ka lir aser iba teloki dang Naga yimten tebilemtsü atema inyaktettsü ta ashi.
Election aser politics ya mapa nung shimokba, contract mapa inyakba, transfer/postings aser sen alemba indang dang masü saka infrastructure melenshiba aser human resource development indang lir, ta Vikheho-isa shisem.