NPF-i NPP den tesentaktep yangluogo; JD(U) den-a jembitepdar

Kohima, Tsüklai 14 (TYO): NPF aser teyariteper teloktem dena taruba sorkar akümtsü ta tanü Nagaland Chief Minister T R Zeliang-i ashi.
NPF Kohima division atema Election Campaign tenzükba sentong nung o jembidang TR Zeliang-i “Tentonü NPF aser National People’s Party (NPP) tsüngda tesentaktep alitsü mulungtepogo aser ano JD(U) dena jembitepdar” ta ashi.
“Sorkar mekümtettsüsa tensa majurutsü aser yamaji ajurutsüsa aküm nunga NPF-i Nationalist Democratic Progressive Party denbo melokteptsü” ta paisa shisem.
NPF-i BJP den tesentaktep pilar asü ta osangbeneri asüngdangdang, “onoki parnok den mepila lir kechiyong tang NPF-i aniba DAN sorkar nung BJP minister 2 aser advisor to CM ka lir” ta TR Zeliang-i langzü.
“BJP-i mepishiba nung ajemdaker onoki parnok den tesentaktep malitsü ta lemtetba meyipa agi. Onok teloktep meraksai lir aser parnoki dang telemtetba agitsü. Parnok atema kishi lapoka dang lir aser parnoki onok toktsür moura, onoki maneni tesentaktep ayutsü” ta paisa shisem.
Neiphiu Rio-i NDPP tentetba atema olen ka asüngdangdang, “Pa onok dang nungi pilaba atema ni kanga pelar, kechiyong onok külemi dang ali asüba teti mangatettep adoka raratsü saka tangbo pa telok balaka nung denogo” ta chief minister-i langzü.
“Rio aser tangartemi ni BJP nung adentsü ta tai tongloktsü saka ni BJP nung madentsü, saka tesentaktep dang ayutsü. BJP-i onok den menden lemsatsü merangdang saka ibaji onoki magizük” ta paisa ashi.
“Hopta ana tsüngda Nagaland nung alirtemi sorkar tasen ka shimtsü aser iba jagi Naga nunger taginübatem ayimmoktsürtem- NPF Party-i iba campaign tenzüker. Onoki Mangdang tasen ka, Tereprangtsü tasen ka aser Tarutsü tasen ka dak rangloker Nagaland melenshitsü atema apusor” ta tanü NPF Kohima division election campaign tenzüktsüdang TR Zeliang-i sangoktsü.
NPF manifesto nung aliba ama onok atema tongtipang teinyaktsüji Naga Yimten Tebilemtsü koktettsü atema lir. Onoki kin hoho, tongti telok, arogo,civil society, NGO aser NNPGs den yaritepa Naga yimten latetba mapa inyaktsü” ta paisa ashi.
NPF-i Elections 2018 atema maparen tenzükdang ozü sorkari terenlok aser infrastructure yanglutsüba dak rangloktsü. Onoki tongti süa bilembaji nübortem nem lenmang tajung agütsütsü atema lir. Asen state nung rongsen peria mali aser iba jago onoki India sorkar dang gari lenmang dak sendakba maparen inyaktsü atema teyari meshiogo, ta chief minister-isa shisem.
Sentong nung NPF Tir Dr Shurhozelie Liezietsu-i o jembidang, “1963 küm Nagaland state tentetba aser 1964 nungi regional party tenzükba sülen nungi Naga People’s Front-i Naga yimten latettsü atema tongti süa inyaka arur aser iba tangatetba nung noktaka lir,” ta ashi.
“NPF party-i Naga yimten timi latettsü atema mapa aika inyakogo aser iba alizüng matong tashi maneni inyaktsü” ta paisa shisem.
“Tangbo NPF party nung tenendak aser bendanga agütsüba MLA kar den candidate tasen aser nübo tajungtem dena lir. NPF nem sorkar akümtsü tashi agütsüra Naga nunger atema mapa tasen aika inyaktsü” ta NPF tirisa shisem.
Naga nungertemi ‘An tebong’ aser ‘saffron party’ tsüngda bendangtsübaji zübazübar. Hindu putirtemi ‘saffron’ amshir aser BJP ya ‘saffron’ party ka lir aser parnoki Hinduism pusema prokshir. Iba jagi BJP-i aniba sorkari nashitem atema Unique Identity Number amshitsü. Anungji, Naga nungertemi asen state atema koba party shitak asütsü ta angatettsüla, ta Dr Shurhozelie-isa ashi.
“NDPP-i tashi angutsü atema dang BJP den menden lemsatsü mulungtep. Anungji paty züngsemtemi taruba election nung item tashitem madak takok angutsü atema inyaktsü mepishir. Tashi kechaia Naga nunger raksatsütsü makok aser tashi aginürtemi Naga nunger joko manishitettsü. NPF-i Naga nunger kümzüka ayutsü renema lir,” ta paisa ashi.
Tanü agiba sentong nung NPF Kohima division kübok candidate 5 aden. Parnokji Keneizhakho Nakhro – 8-Western Angami, Dr Tsielhoutuo Rhutso – 9-Kohima Town, Khriehu Liezietsu – 10-Northern Angami-I, Khrielezo Bio – 14-Southern Angami-I aser Kropol Vitsu – 15-Southern Angami-II Assembly Constituency.
Sentong nung mendenji NPF Kohima Division Campaign Committee Convener Khriezobeinuo Sanchu liasü, Khedi Baptist Church Associate Pastor Kezhachütuo Miachieo-i temoatsü meshia sarasadem, NPF Kohima division president Gonei-u Sirie-i tesentepertem pela agizük aser NPF Kohima division treasurer Suosahie Sachü-i anküp tepela o jembi.