NPRAAF-i Angh dang Parl. Secy tem agientsü akhanger

Kohima, September 09 (TYO): Nagaland Public Rights Awareness & Action Forum (NPRAAF)-i Nagaland aser Arunachal Pradesh Angh, P.B Acharya dang mapang tera danga meintoki linük temzüng nung aliba ama Supreme Court-i tuyuba nung ajemdaker ozüng alema Parliamentary Secretary tem aser Advisor tem shimba anema inyaktsü mepishia metetdaktsüogo, ta tanü NPRAAF, Information & Publicity Cell-i sangdong ka ajanga metetdaktsü.
Assam Parliamentary secretaries Act of 2004 obendang agütsüdang Justice J.Chelamswar, Justice R.K Agrawal aser Justice A.M Sapre nungeri akümba Supreme Court Bench-i, Parliamentary Secy. tem shimba, itasen, allowance aser tanga provisions agütsübaji temzüng anema lir, ta shiogo.
“2004 küm January 1 nü Parliament nung constitution 91st amendment bill, 2003 agizüka liasü. Union Parliament-i Arrla 75 aser Arrla 164 yanglushia state tem nung council of Ministers ji Assembly menden nungi shilem 15 dang asütsü, ta shia liasü.
Nagaland sorkari temzüng alema state Minister aser Cabinet minister jenjang nung Parliamentary secretary tem aser Advisor tem shimba ajanga iba Act raksatsür; iba Act agizükba ya amajok nung nübur sen aika indokba nungi kümzüktsü atema yangluba lir,” ta NPRRAF-isa metetdaktsü.
“Nagaland aser Arunachal Angh, P.B Acharya-i tang tashi Supreme Court obendang alema state sorkar ana nung temzüng dak mapet Parliamentary secretary tem aser Advisor tem alitsü atema temelaba agütsüba ya kanga tia maka. Iba onük nung Angh-i zübazülema malitsüla, kechiyong pa teinyaktsü shilemji sorkar ketdangsütsü masü saka linük temzüng kümzüktsü atema lir,” ta NPRAAF sangdong nungsa shia lir.
“Tanga High Courts aser Supreme Court-i obendang agütsüba ama Kohima Bench of Guwahati high Court-i obendang magütsüdangyongi Angh-i pa teinyaktsü inyakra Angh menden akhümket alitsü. Anungji India temzüngtem kümzüker ka ama Angh-i inyaktsü aser nüburtemi Angh office nung tamang katettsü atema NPRAAF-i Angh dang mepsihir,” ta parnokisa metetdaktsü.
Tanü, September 09, 2017 nü NPRAAF-i Angh, P.B Acharya nem pa indang Special Officer ka ajanga Kohima Bench of Guwahati High Court Verdict-i obendang magütsüdangyongi Parliamentary Secretary tem aser Advisor tem aginetsü atema temepishiba ka agütsüogo.

You must be logged in to post a comment Login