NRC nung mezüngoksemertem nem Mamata tejenokdak agütsütsü nangzük

Guwahati, Aenjeti 10 (Agencies): Assam nung National Register of Citizens (NRC) dak sendakba nung West Bengal Chief Minister Mamata Banerjee-i Sangtennü par state nung aliba nüburtem dang Assam nungi nisungtem mindokra parnok nem tejenokdak agütsütsü asoshi mepishiogo.
“Nenok ajak kanga kümkümshia alitsüla. Nisung kar dangi asen state-i arura parnok temindok,” ta north Bengal, Alipurduar district nung rally ka akadang lai ashi. west Assam, Bodoland Territorial Council kübok aliba tesem nung 2012 küm Bodo aser Muslim nunger mangatettep adokba mapang nung, north Bengal nung Assam nungi refugee arurtem nem tejenokdak agüja liasü.
Banerjee-i ashiba agi, Bengali oshi jembir lisopur ta jangjar aliba aser Bihar nungi Hindi jembirtem NRC update asüba nung densema mali.
“Assam kübok Alipurduar, Murshidabad, Malda, Jalpaiguri nung küm aika alirtem densema lir. Asam nungi Bengal nung arua nisung aika lidar, saka onoki parnok mesenmetoi mamshir,” ta lai ashi. Iba den bendenloksema lai ashiba agi, West Bengal nung alirtem shilem 30 bo tanga state nungi arua alirtem lir.
2012 küm Assam nung mepetmesü adokba bilemtetshia Chief Minister-i ashiba agi, kidanger state nungi nisung aika arrtsü nung aliba West Bengal district tem nung jenoka liasü.
Assam ya arrtsü nung aliba state ka ta rasaa ashiba den la ashiba agi, lai iba ken o ya benok, kechiyong Assam nung kechisa atalokdir ibaji West Bengal dak sendaka lir.