NSCN-IM dang kechi ashitsü ?

Nübortemi meimlai alidang August 3 nü Delhi nung NSCN-IM o India sorkar na tsüngda Naga yimten tebilemtsü tatem küma latettsü asoshi tamentakdak onük kar nung sign asüba sülen yashi NSCN-IM tongti zülur Wb.Th Muivah parnok oking Camp Hebron tonga aruogo. Pa tonga aruli Dimapur nung tayimtsü anendak pa agizüktsü ataa alirtem den jembidang, tang pa Nagaland-i aruba ya India sorkar den August 3 nü renemba ken o nung ajemdaker Naga yimten tebilemtsü teti atema tatembang küma latettsü asoshi Naga nungertem den shisalemsateptsü aru ta shiogo. Atangji, tamalena NSCN-IM lenirtemi kodang Naga yimten tebilemtsü ken o ya telatetba ka dangi arutsüsa kümdir nübortemi mulungba nung dang latettsü, kechiyong nübortemji tematiba  ta shia lir. Iba oji shitak, kanga tajung aser iba amaji shisalemsatepa inyaka aotsü imlar. Aji oda, jungli mejungli tangbo India sorkar den Naga yimten ken o jembir NSCN-IM telok dang asünungji parnok den Naga nungertemi shisalemsateptsübaji kanga tongtibang lir, kechiyong tanü langka ka latetba mesüra melatettetba agi asüng anisüngzüktsü mesüra kangshitsü. Aji oda, tanü alirtemi tarutsü Naga lima lanurtem asoshi Nagaland ano tasen ka yanglutsütsü tenzüker amato bilema ajaki iba maparen nung kanga süoki ia inyaktsüla. Atangji, tang tashibo India sorkar den August 3 nü renemba ken o ojang kata mesayu aser metetdakja mali nungji, nisung ajaki pei pei bilemba jembirba dang lir. Ajisüaka, tezüluba nung kechi zülua aliar memeteti pei pei bilemba jembiba nung jagia aiben tagitsü adoktsü. Kechikomaka zülur lidir liang, aji Naga nunger meyong anungji Naga nungertem dang mesayu maremtsü. Ajisüaka, Naga nunger tarutsü putu asoshibo August 3 nü NSCN-IM o India sorkar na kechi latet mesüra kechi renem ta asübaji tongtibangba masü saka Naga yimten tebilemtsü ya nübortemi komaka latettsü bilemer ta asübaji tongtibangba lir. Anungji, tang Muivah ya Naga nungertem den shisalemsateptsü aru süra Naga nungertemi pa den shisalemsateptsü asoshi atsüayong masütsüla. Aiben asenoki yimten aser loktiliba nung nisung tamajung dang majunga ta mashir saka kibok nung nüngnünger, anungji asenok nüngsen jembitsür akümer. Asenoki metettsüba kaji yimten nung süli mesüra lokti nung süli jembitsü aser inyaktsü mapang kaka lir. Anungji, kechi tebilemtsü onük südir süaka mapang nung jembitsüla. Aji oda, tang ya Naga nungertemi NSCN-IM dang Naga yimten koma latetdaktsüner, ibaji ashitsü mapang lir. Iba ama mapang nung telok tenüng nung mesüra kijaia NSCN-M lenirtem dang pei bilemba ashiba jagi asüng liyonga aotsüba Naga lima ka yanglutettsü.Nüngdaka ta bilemra, Naga nungertemi parnok dang kechisüdir süaka Naga  yimten tebilemtsü ya Naga nunger ajak ajangzüktsüsa aser tatembang kümtettsüsa Naga yimten nüjiso atema inyaker tanga teloktema dena dang India den ken o jembia latettsüla ta akangtsüa akok. Shidi süra, parnoki August 3 nü India den tangatettep onük kar renemba mesayubaji shitak dang ta asenoki agitsü akok. Aji oda, Naga nunger NNC aser NSCN telok ajak külem ser table ka nung India den mejembi tashi August 3 nü renemba onükji melapoki yua liang ta ashitsüa akok, kechiyong kodang August 3 nü renemba onükji lapoka züngdir, iba jagi FNR teloki inyakba mapa ajak amajok akümtsüa akok. Aji oda, NSCN-IM lenir Naga nunger nübortem den shisalemsatepi aru süra FNR telokia kechi ashir ta asübaji tanü aser asüng Naga lima asoshi kanga tongtibang asütsü. Aji oda, Naga nunger kin shia nungi lenirtemi tarutsü Naga lima asoshi bilema parnok den ochimulung agi shisalemsatepra, iba jagiang Nagaland tajungba ka yanglutettsü. Naga yimten tebilemtsü onüktem nung tamakoktsü aika lir, anungji maritepi telok ajaki kasasa shilem agia inyakra, makokyonga ajak tamakok aser kokra ajak asoshi takok asütsü. Joko, tangbo Naga lima ya lemsar masü longjemer yanglutsüla ta bilemer.