NSNA-i lungkak aitba anener; Tanü nungi mapa inyaktsü

Kohima, July 6 (TYO) : State sorkari parnok akhangba onüktem metongtsüba agi anogo 11 tashi lungkak aita aruba sülen Nagaland Staff Nurses Association (NSNA)-i lungkak aitba sentong anentsü telemtetba agiogo.
“Tanü NSNA rongdak senden alidang lungkak aitba sentong anentsü telemtetba agi” ta NSNA tir Catherine-i sangdong ka ajanga metetdaktsü.
“Ajisüaka, state sorkari takhangbatem metongtsüba atema NSNA-i ozüng amertem dang nungi teyari agitsü lemtetogo” ta laisa ashi.
Asüng nungi NSNA kübok züngsem ajaki akhi ama mapa inyak tenzüktsü ta NSNA-i Principal Director, Health and Family Welfare Department, Nagaland dangi shidi ka ajanga osang metetdaktsüogo.
State tesem balala nung sorkar mozü ki aser health centre balala nung shirangertem anepalutsü atema NSNA-i süoki ia bilemtsür, ta NSNA züngsem kari ashiba osang angazüker.
Ajisüaka, parnoki degree aser diploma degree alir aser malir staff nurse o nursing sisters (Registered Nurse Registered Midwife – RNRM) nungertem tsüngda inyakyim yanglushitsü aser mapa nung jenjang atuba inyakyimji general nursing staff pur ajak dendakjang ta takhangba agütsüba nungi masetshir, ta NSNA züngsemtemisa ashi.
June 26, 2015 nungi tenzüka anogo asemnü tashi NSNA kübok nurse temi badge tanak khaloker lungkak aittsü tenzük. Iba sülen June 29 nungi parnoki anogo asemnu lokti casual leave agi.
Sorkari Nagaland Nursing Service Rule 1988 yanglushitsü ta shiaka July 1 nü parnoki ibaji magizüker ta metetdaktsü aser July 2 nungi ano anogo asemnü lokti casual leave agi aser tatemsa NSNA-i mapang tatakzük mekai lungkak aittsü lemtet.
NSNA-i state sorkar dang degree o diploma maliba staff nurses aser nursing sisters (Registered Nurse Registered Midwife – RNRM) nungertem clinical line aser degree o diploma alir nurse tem teaching o tutoring line nung inyakdakjang ta takhangba agütsür.
Parnokisa mapa nung jenjang atuba inyakyim nung general nursing staff ajak adentsüla ta akhanger.