Nüburtem nem jangjashitsür

– S. T. Yapang. Lkr. Kohima, Para Legal Volunteer.

Aenjeti 12 aser 13, 2018 Ao Milen mezüng tapak, aser 14 nü Tir Yimyim Olemsabang nung koba Mokokchung District kübok Social Welfare Department nungi tasür kibong nem teyari sen 20,000 agütsüba nung meshitakba putetba osang adokogo, iba osang den semloka maneni jangjashiba den Department nungi nüburtemi item teyari ya tajungba ngudaktsütsü asoshi talila rajemtsüa zülur.
Tekalen shia aliba anogotem adokba osang nung Aliba yimdak I. Akum Kichu asüba asoshi Shashikala Imchen aser Mokokchung compound nung Repalepden asüba asoshi Waisangla teyari agütsür amai sür nung manguba shisema alibaji parnoki tamalen sen ya agizüker, saka ibala National Family Benefit Scheme nungi sen ya angu ta memeteti liasüba dang ta metongshia azüngtsü mepishir.
Iba den talila kaji Longsa yimdak Lolenpenba asüba asoshi Nungsangtola teyari angu ta zülua aliba ya tasür aser tajangzük agir nisung tenüngji shitak lir, saka senbo parnok ket matong, parnoki iba NPBS ya memetet aser teyari asüngdanga mali, saka teyari anguba tejangja zülua aliba osang angashia iba senji angutsüsa asünungji kanga yongyaseta atar.
Kodang iba osang temai adokdakja onoki asüngdangtep, ishikati sen mangu ta shia liasü, saka anogo ishika lirbo “Oda sen to alemli agizüker liasü sürnung amatoker liasüba dang” ta ano osangji jangjashia aru, saka item ajakji ochimashi mapasa lir, kechiyong tebushir mangur nung kodasür kiburi memetet par tenüng nung sen angutsü?
Iba NFBS ya nisung asür ajak angutsüba masü, anungji asenokia ochishia shitakba sensaker kibong nungi kibong mesüa alisang/la arishi küm 18 tema aser 60 tekübok asüdang Department dang teyari meshidi. Iba NFBS asoshi Anganwati center nungi form den tasüba kuli yim/ward chairman nungi meshir District Welfare Officer dangi asür kinunger rongnung tajangzük angutsü anasatiba pa/lai teyari meshia zülutsüla. Tang asü nung Angawadi center kecha nunga NFBS form makatsü, anungji ibaji medeni zülua atatsüsa akümtsü, iba khuretjibo Department-i abentsü. Alemli asüba tang ang asü ama 2014-15 küm asüba nungji sen agüja lir, saka item amaji asenoki sen apayudang arishi küm ajema züluba mesüra sür küm aika süir sürnung tang ang asü amaia mezüluli, 2017 küm asür dang iba küm ya teyari meshia züludi.
Ano itasen machir kibong nungi tanur ana aso tashi Social Welfare Department nungi Pradhan Matru Vandana Yojana scheme nungi tajangzük agitsüba ya memenui tenzüktsü imlar, aser Department-i nübur ajak nem osangkaket nung jangja metetdaktsütsü tim. Iba teyari koma agitsü süra, tetsür shiba mashisa lir, lai mashisa jangjali yongi anasatiba Angawadi center nung oa la tenüng züluokdaktsütsüla, iba sülen lai tanur ya mozüki nung asotsüla aser tanur asoba kaket ajak junga bendena yur, tanur ita trok ajung tashi koba mozü aser ajemsa agitsü mozüki nungi agütsür, item ajak tembanga agitet nung dang senji angutsü, shitakbabo telemsa asemben lemsar agütsütsü iba PMVY scheme nung shia lir, saka Department mapa temelaba akümtsü den tanur nem mozü mora shitak agütsüdaktsütsü meji Department-i inyakyimji tera melenshi südi.
Angawadi center mapang shia semdangtsübaji CDPO mapa lir, ibai Hopta shia semdangtsü koka lir, idangji mashisa tenüng züluoka alirji anir arua sayutsü akok. CDPO kari pa/la office-i mashisa alirji anir arutsü tuyura aji tim masü, pa/lai dang arua semdangtsüla.
Anosa Labour department nungi aayanger kibong aser nijatemi teyari tajung ngudagi, aser iba teyari sen ya TBT ajanga agütsür asünungji shingaia mechitsüi ne indang bank account-i indang indanga arur. Iba teyari koma agitsü süra pei district nung Assistant Labour commissioner office, Labour Department nungi Construction worker form meshitsü, ibaji angadi angutsü aser nai yangji züluja aliba ajak abensa züluba den Council/Ward chairman nungia zülusemtsür mezüng küm asoshi sen 325 dener office nung oa agütsütsü, iba ajanga ne dangi küm shia 1000 aittsü, ner tanur ana class ter atong tashi tanur shia ita nung sen 500 aittsü, tanur asodang aser operation agiba, mozü kidang amungba, ajungben lendong ajurua asüama ajak nung teyari angutsü tajungtiba rongnung iba Construction worker yaa ka lir.
Department ajak nung nübur asoshi teyari lir, saka aseni asen temeten asoshi noktaktsü atsüayonga lira, asen tajangzük magibaji tilaba sür tarutsü nung asen chirnur aser tangar asoshia lenmang tajungji shibangatoktsür, ibaji nai aser ni pei lima memeimba ajanga lir, aji ashikülaker asoshi temoatsü lenmang tajung ka kümdaktsür ta metetdi.

You must be logged in to post a comment Login