Nüngdakra India anema nuclear amshitsü: Pakistan

Islamabad, July 08 (Agencies): Ato kilonser Narendra Modi kübok Centre nung BJP sorkari kidanger linüktem den tesentaktep tajungba akümtsü asoshi meranga inyakaka Pakistan-i, nüngdak dang adokra parnoki parnok ket nung aliba nuclear raraba oset dena amshitsü ta India amokmerenba o jembiogo.

Pakistan Defence Minister Khawaja Asif-i, kiralongraba nüng atemer India-i Pakistan anema raratsü meranger ta aitsüba osang ka tanü metetdaktsüogo.

Onok taküm alitsü asoshi nuclear raraba oset amshitsü nüngdak dang süra onoki amshitsü, ta Pakistan Defence Minister Khawaja Asif-i ashi.

Geo News programme ‘Jirga’ den jembiba mapang Asif-i, nuclear raraba oset amshitsüji takoktsü mapa ka lir, kechiyong item raraba osetji noksa atema ayuba dang masü saka nokdangtsü asoshi lir, ta ashi.

“Iba meraji magitsü asoshi asenoki sarasademtsüla, saka nüngdak dang süra asenok taküm alitsü asoshi amshitsü, asenoki amshitsü,” ta Hombar nü Asif-i ashi.

Paisa, Pakistan nunger defence tashi ita lir, ta ashi.