Nüngo mapa nungloktsüba

– R. Nükshi Aier.

1. Akhi alemli tsürapur mapang nung,  Nok o nüji par sübotsü aküm,
Mangko tajem jiang penputepa liasü,  Mangko nükla nung parnoki arishi-e ao.
2. Anü adok aben parnok tebilemtsütem jenti,  Ammang sangwa metitemi –
Konang sür naroküm – saka amajok.  Mapatem nung tebur kümtepa liasü.
3. Yim tulu tila ajak,  Pei among süngküm küpok
Ozü sür shir ali ta! Saka Tetsübu,  taoksatsü agi sünger liasü.
4. Iba ama tensa, mapang ka nung,  Anüngtsüng tatem külen nungi;
Nükjidong tulu nung, Tsüngrem tenyar Dr. E.W. Clark, tajungbensang tonga aru.
5. Tejak jitepa ajuruteptsü tetsübutsüka,  Naga – Aortem den nguyua
Temba, tinu yimtepa, temeimtep manung Pa ajanga Tsüngremer nükjidong atalokdaktsü.
6. Tsüngrem ain sür sayatenya –  Mapatem ajanga parnok molung süngtsü,
Tetsükdaktsü liaka, item ajak kokteter  Tsüngremer sentong atalokdaktsüogo.
7. Naga tenem – iba Ungsemtem nungbo,  Tamendakdak – jibo, Aortem lir,
Jangratemtsü agi asüngba – Tekümtet tera ayangdak, Na Aolima
8. Aortem maongka yabo koda? Kintemi Aortem jilu sür tsüngkang repranger,
Tsa! Ta merangdanger saka marüzüker Züzüa alitsü mapang masü, Na tejatetba kin.
9. Rongitsü tajungtiba ama lenirtem, Tanela temeshi-e asüngba mongin Laishirtem!
Temeimtep sür telungjem nung talupusa –  Ao lima tejakleni anitsü, koda tajung.
10. Maongka ajanga putu jenti asameyanga inyakba –  Temoatsü tajangzük ya ati! ta
Khrista ia temolung ajitsü –  Khrista maru tashi Aortem khuret tulu
Nunglokja lir ta – saksalema inyakdi, Züzüa – amoa oa teli, kechiyong
Na mitkar mapang – bang nung lir. Tsüngremi Aortem moajangma.