Ochiji inyakdangtsüla

Tebang kija agi asenoki ochishia alitsü ajungshitepba ya dang masü aser tebang kija agi Tsüngrem dang amanger ta nangzükba ya dang masü saka asenoki taküm nung ochi aser tamangji mapa agi inyaka sayutsü kanga nüngdaker. Aji oda, asenoki Tsüngrem den ochishia aliba aser Pa dak amangbaji mapa agi inyaka sayutsü atema tashi angatsü kanga tongtibang lir. Tashi angaba agi asen den Tsüngrem adenba tali jangjar aser Tsüngremi asen taküm tila ajanga mapa tulu inyaker. Simon Peter ya ango pua senzür ayanger ka dang liasü. Pa mapa nung aküm maket aser pa dak ain mali, saka pai tasür shia arudaktsü aser tsüngtsüker jajadaktsü. Item ain aser tashi ajakji ochi dak amanga inyakdangba ajanga aru. Laishiba nung Luke tapu 5 nung ashir, kenü anogo tzüyim tzüküm anasa Yisu Khrista dangi Tsüngrem o angatsü asoshi pa anasa telok tuluka adenshi. Item telok rongnungji taneptsü aginer jenti liasü südi. Item jagi Pa dak kongshitsü nungtepa aru. Idangji, tzüyim küm anasaji rong ana anena liasü, anungji rong ana rongnungji Simon meyong rongi Yisu ai. Simonji ango pur ka liasü. Parnokji aonung piyong ango pua aniseta senzür, kecha mapu tezü danger anisüngzükba mapang ka liasü südi. Idangji, Yisui telokti dang sayutsüngitsü tenzük. Yisu sayutsüngi temer külen Pai Simon dang tzü tarokleni ir zütsük aontsü ashi. Iba anogo nung Yisui telok dang kechi indang sayutsüngi Laishiba nung shia mangur. Ajisüaka, Pai tamang indang, tashi angatsü indang aser Ochiba metettsü indang sayutsüngir südi ta bilemer. Anungji, Yisui telok dangbo o agidang sayutsüngi saka Simon dangbo mapa agi inyakdangtsü asüngdang. Idangji, Simoni Yisui sayutsüngiba o ajakto ochi asütsü ta amang, anungji pai tashi angaa zütsükji ondaktsü. Ashiko, Simoni pa zütsük nung mesemika ango mountet tashibo ango paikaji aputsü tabo meimlaka asütsü. Iba mapangjiang Simon asoshi Tsüngrem ajuruba mapang ka liasü. Ango paikaji puaka, item angoji pa magi, kechiyong item ajakji toktsür pa Yisu nütsüng aküm aser tenünga Peter melen. Peter nem moatsüba temoatsüji ango dang nungi tuluba liasü. Yisui Peter nem ango pudaktsübaji angoji masü saka pai ango apuba amaji panü nung jagi Peteri Tsüngrem ain agi nisung aputsü ta kuli agütsütsü nükjidong liasü. Iba jagi Peter tasü ait aser sayatenya tulu amshia Tsüngrem mapa inyak. Asenokia Yisu lir tabo jangjaa alitsü akok. Paji Kibuba ta asenokia amanga alitsüa akok. Pai moatsüba temoatsü manung asenok lia alitsüa akok. Aji oda, asenoki Yisu indang otsü aika meteta alitsü akok, saka ochi o kaji, asenoki Pa ain aser tashiji majangshi tashi aser ochi o ji mapa küma meinyakdang tashi, asenoki Tsüngrem nungi ain tashi aser temoatsü agizüka tangar atema temoatsü, pei asoshi tajangzük aser Tsüngrem atema tepelatsü asütsüsabo meinyaktettsü. Asenok dak mapa tulu inyaktettsüsa tashi tulu lir, saka asenoki Yisu dak amanga meinyakdangba agi item tashiji ali-mali memeteter. Aji oda, Yisu dak tashi alibaji metettsü asoshi asenoki Pa dak amanga tashi angatsüla. Yisui ashi angaba nung tashi tulu lir ta Peteri metet. Aji oda, asenokia Yisui ashi anga inyakra, ochiji metettsü aser iba tashi nung asenokia Tsüngremi mulungba mapatem tashi aser tasü itta inyaktettsü.