Oct 12 nungi Bihar nung elections agitsü; Nov 8 nü votes azüngtsü

September 9, 2015 nü New Delhi nung Chief Election Commissioner Nasim Zaidi-i Bihar Assembly elections agitsü anogotem osang metetdaktsüdang agiba noksa angur. Noksa nungsa Election Commissioner tem – A.K. Joti aser Om Prakash Rawat na angur.

 New Delhi, September 9 (Agencies) : Election Commission-i Bodbarnü Bihar assembly elections agitsü anogotem yimjak nung metetdaktsüogo.

October-November tsüngda shilem pungu lemsar elections agitsü aser mezüngbuba shilemji October 12 nü aser November 5 nü tatembangba agitsü. Iba sülen November 8 nü vote azüngtsü.

“Paramilitary forces-i polling station ajak anüktsü” ta tanü Chief Election Commissioner, Nasim Zaidi-i metetdaktsü.

Bihar nung yimten telok ajaki CRPF, CISF aser BSF forces meshiogo aser assembly constituency 47 shi ka nung Left-wing telungpur khuret lir, ta ECI-i metetdaktsü.

“Onoki voters temi sen mashileni amshiba aser sen agüja osang prokshiba inyakyimtem mittsü. Yi aser sen dak sendakba mapa mittsü atema central aser state agencies 9 nem mapa nungloktsüogo” ta Zaidi-isa ashi.

Tanbo Electronic Voting Machines (EVMs) nung candidate tem indang noksatem alitsü, ta paisa shisem.

Züngsem 243 agi akümba Bihar assembly indang kümsük November 29, 2015 nü tembangtsü.

Küm ter tashi yimsü süa aruba sülen Chief Minister Nitish Kumar-i kümsük tasembuba inyaktsü atema meranger. Tan Bihar elections nung Nitish-i Rashtriya Janata Dal aser Congress den yaritepa shilem agitsü.

Küm 17 tashi Bharatiya Janata Party (BJP) den tesentaktep lia aruba sülen June, 2013 nung Nitish-i NDA teloktep nung madentsü telemtetba agi.

Taoba Lok Sabha elections nung BJP-i Ram Vilas Paswan’er Lok Janshakti Party aser Upendra Kushwaha’er Rashtriya Lok Samata Party na den yaritepa Bihar nung takok tulu angu aser tan-a parnoki iba kasa takok angutsü imlar.