ODI nung India cricket team temaba jenjang tongtetogo

New Delhi, Tsüklai 14 (Agencies): Sangtennü (Tuesday) Port Elizabeth nung tebur ODI (One Day International) pungobuba asaya nung India-i South Africa madak run 73 agi akokba sülen India cricket team ODI ranking nung temaba jenjang tongtetogo.
Iba asayamung nung, India team-i Durban nung wicket trok agi , Centurion nung wicket teku aser Cape Town nung run 124 agi South Africa madak takok ngutetta liasü. Iba sülen pezübuba ODI asaya nung tzünglu aruba ajanga, India teami tia maka South Africa makok saka Port Elizabeth nung pungobuba asayas nung, India-i kokteta, iba ODI series kokogo.
Iba takok ajanga India team-i point 122 ngua temaba jenjang tongtet aser South Africa team point 121 aliba nungi 118-i atsüngzüka luogo. Iba ODI series asaya tenzükba mapang tashi nung India nunger (119) South Africa dang nung point 2 agi tajemba liasü aser ODI ranking nung temaba jenjang tongtettsü aema asaya pezü akoktsü nungdaka liasü.
Taoba mapang 1992 küm akokba sülen tang tashi nung, India cricket team South Africa team ODI mesera tanga format series asaya khen danga koka mali. 2006 küm, T20 asaya ka nung dang India-i South Africa madak takok ngua lir. ‘Mohammed Azharuddin, Sachin Tendulkar, Sourav Ganguly, Rahul Dravid mesüra Mahendra Singh Dhoni,’ nunger lenisüba kübok khen danga kokteta maliba captain, Kholi kübok tang India nungeri ajangtetogo.
Maneni, final asaya nung, South Africa nunger batsman temi kanga meranga India nunger spiner Kuldeep Yadav indang ball nung asaya saka takok mengutet. Yadav-i over 10 nung wicket pezü agi, aser Yuzvendra Chahal-i over 9.2 nung wicket 2 agia liasü. South Africa team-i over 42.2 nung run 201 dang ngur ajak out süadok.