ONGC pur rong ka apokba nung nisung 5 pokset

Bangalore, Tsüklai 14 (Agencies): Sangtennü Cochin Shipyard Ltd, Kerala nung ONGC pur rong ka apokba sülen idakji inyaker nisung pongu poksetogo aser parnok ti tashi yiruogo.
Ketdangsertemi ashiba agi, Sagar Bhushan rong ya rongnendak anener yanglushia liasü asser iba mapang nung rong shilem ka anepdang 9:15 ako shi nung air-conditioned compartment anasa gas leak asüba ajanga apok.
Asürtemji C.S. Unnikrishnan, K.B. Jayan, Gibin Reji, M.M. Ramshad aser M.V. Kannan ta jangjaogo. Parnok ajak ya iba tesem anasa alirtem dang lir.
Osang ajanga ashiba agi yirurtem rongnung Sreeroop temang kanga mejungi lir. pa temang kanga mejungi ronger lir. Maneni mozüki nung anepalua alirtem ajak mi agi ronger lir.
Cochin Shipyard ajanga iba lendong nung asür kinungertem ajak nem sen lakh ter ter agütsütsü asoshi sangdongogo aser yirur alirtem ajak temang anepaluba nung sen indokba parnoki menoktsü telemtetba agiogo.
Sangtennü ya Mahashivaratri benjung aliba ajanga soti liasü aser dry dock nung mapa inyakertem ya contract nung inyakertem liasü. Parnok ajak agi 20 iba rong yanglushia liasü.
Ketdangsertemi ashiba agi, mapa inyakertem ya tzü abenba tank anasa mapa inyaka aliba mapang nung iba lendong ya atalok.
Iba lendong kodaser atalok, iba ya asadangtsü asoshi tetuyuba agütsüogo, saka ketdangsertemi iba ya asaa inyakba maparen kabo masütsü ta shiogo.
Cochin Shipyard chairman & managing director Madhu S. Nair-i osangbenertem dang iba lendong ya gas leak asüba ajanga atalok ta ashi.
Iba totzü atsüba rong ya ita pezü tejakdang yanglushitsüba atema aru aser iba ita tatemi yangluzüka tanaben mapa inyak tenzüktsüba liasü.