Ongpangkong Senso Telongjem, Dimapur

Nagaland Foothill’s Road Coordination Committee (NFHRCC), Joint Coordination Committee (JCC) maneni nungiter aser temzüng 371 A nung Naga nungertemi metettsü aser teinyaktsü tongtipang onük ka Ongpangkong Senso Telongiem Dimapur-i lemsateper:

Nagaland tenemtsüng lenmang dak sendakba nung Nagaland Foothill Road Coordination committee aser Nagaland Minicipal Act dak sendakba nung Joint Coordination Committee takok ngua aotsü asoshi maneni nungita yariteptsü ta 46 buba Ongpangkong Senso Telongjem Dimapur, Lokdi Mungdang, November 25, 2017 anogo nung Pangzüng süa renem.
Sentong nung tongti 0 jimbir Wb. Talitsüngba ajanga “Temzüng nung Naga nunger temeten aser teinyaktsü” onük nung ajemdaker jembidang, India temzüng “371 A Nagaland State balaka, iba temzüng nung kecha agia tetsükdaktsü makai:
– Parliament-i yangluba temzüng item: .
i) Naga nunger tamangba yimsü mesüra loktilibaliro inyakyim,
ii) Naga nunger Sobaliba aser inyakyim yimya,
iii) Naga Sobaliba’melaba ama oka-tsüka yimsüsüba aser obendang,
iv) Ali aser liküm kiburkümba aser belenshiba, Nagaland Legislative Assembly-i melemtetra, Nagaland state nung mamshitsü”.
Iba temzüng ajanga Naga nunger nem temeten agütsüba Naga nungeri junga mangateti tim teinyaktsü aika meinyakba atema nemjema ashi. Naga nungeri meteta alitsü aser teinyaktsü tongtipangtemji yamai agütsür :
i) Naga-hills Tuensang Area Act 1957 nung shia aliba liküm telongtet kasaji State of Nagaland ta jatet(01:12 : l963). Saka tesem tonga oa artsü lateta sorkari tamaitsü ayuba kecha kaket nunga mangur, States tsüngda artsü tejangja latettsübaji parliament mapa. Supreme Court nung Assam-i benokba artsü mangatettep alibaji parliament-i temzüng tejangja meyangluba agi adok. Anungji Naga nunger tazüngertemi (Research Scholar) kaket zülu tejangja bushir political ajanga ibai tembangtsü tongtipang.
ii) Inner Line Permit, tzümar nem agütsüba ozüng ya reprangshia asen Naga nunger sobaliba aser rongsen-ren kümzüka ayutsü asoshi temulong agütsütsü nüngdaker.
iii) Nagaland Petroleum and Natural Gas Regulation 2017 ya Naga nunger sobalibai memelar. Iba temeten ya ali kibur atema lir.
iv) Nagaland Special Development Zone resolution nung tzüma artsülen alir ali kibur ali patta sorkari agütsütsü jembidangba ya Naga nungeri magizüktsüla. Tongtipangsa business inyaker tzümar nem item lushi nung permanent settlement permit agütsütsü ta Govemment-i jembidangba ya tai lir.
v) Assam Land and Revenue Regulation 1886 nung ajemdaker Nagaland nung ali patta amshiba ya Dimapur nung mauza 1,2&3 nung dang lir.
Tanüngba Naga lima tesem nung (Kohima, Mokokchung amala) peisasa ajungshia mesüra mepishia pei Ii nung aIi patta meshiba yabo kenyongi tai maparen lir. Temzüngi Naga nunger nem temeten agüja aliba junga mangateti tim teinyaktsü mapang shidak nung meinyakra asen lima bendangertemi atsüngseptsü ana nung lir (Assam, Tripura state ama) ta tongti o jimbir-i tekümdangtsü o agütsübaji tzükongsanger ajaki hau ta agizükba kasa ken o külem Naga nungertem ajak den lemsateper.

Sd/-                                                                         Sd/-
Imkoktemsu                                                          Toshilemba
President, OSTD.                                                 Secretary, OSTD.