Onük: Tsüngrem O dangi meyipdi.

~ Rev. I. Toshi Jamir, Impur.

Lai : 2 Tim. 3:16-17,  Ibri. 4:12, 1 Pet. 2:2, T. Map. 17:11.

1. Okila:
2015 ABAM Omen, “Tsüngrem O dangi meyipdi” tazünger temoatsü asoshi onük nungi tongmelang agi Lai tesayuba kar lemsateper. ABAMi Ao Arogo ajak asoshi küm shia omen ka yur iba nung aotsü meranger. Asenoki ya metetdi, Arogo asoshi omen ayubaji züzüa dangbo mebilemtsüla, ibai kechi atema ayu, iba yagi asenok dang kechi inyaktsü akhanger aser iba ya asenoki mapa kümdaktsür asü masü? ta asübaji ajaki aroka bilemdangtsüla.
Tanü ama alima teraksa aser mesüngjemtet putu ka nung, kija, kibong aser lokti
Tsüngrem o dangi meyipa ajanga dang teyanglushibaji katettsü ta metetdi. Meimchir ali shi taküm temang anema alitsü asoshi chiyungtsü tajung nüngdakba ama, asen tanela aser taküm tashi itta alitsü, aser alima teraksa yanglushitsü, tanela chiyungtsü aser leniba ajokji Tsüngrem O ya lir.
2. Laishiba Tsüngrem O : Alima nung kaket tem madak tematiba kaketji Laishiba ya lir. Kechisarena süitema aotsü saka Tsüngrem O yabo, “Yashi tanü aser teti tatem maka kasa dang alitsü.” Tsüngrem O azüngba ajanga Tsüngremi asen den jembir. Tejen putu ama Tsüngrem asen dangi jungkai adoka mejembitsü, ajisüaka aseni Laishiba azüngba, angaba aser temulung nung ayuba ajanga Tsüngremi asen den jembir aser Pa den tesendaktep yur tazüokba nung taküm alir.
3. Tsüngrem O dangi meyipa temoatsütem:-
(1) Tsüngrem O angatsü karang:
(a) “Shiba dak tangashitsü tenarong aten pai Tsüngrem O angang.” (Matt. 11:15)
(b) “Nisung shiai Tsüngrem O tangashitsü karang.” (Yak.1:19b).
Alima osang aser tatalokbatem angatsü, azüngtsü yongyaba aser jangraba ama nai Tsüngrem O angatsü aser azüngtsü jangang. Tsüngrem O angashitsü tajungtiba tesemji Arogo Tekülem mapang ya lir. Tanü Arogopurji reprangra tekülemi Tsüngrem O angai arutsü mejangrar aser Tsüngrem O azüngtsüa mejangrar, iba jagi tamang nung mainer aser temenen nem moksepdaktsür.
(2) Tsüngrem O angatsü jangra-a aser renema liang:-
(a) “Shiba Tsüngrem meyong lir, pai Tsüngrem O angar, nenoki Tsüngrem O mangar, kechiaser
nenok Tsüngrem meyong masü.” (Yohan.8:47).
(b) Tsüngrem O angatsü nokdangbatem: Yisui Alu nung metsü prokba o-entepba agi atishia
jembiba yamai angutsü. (Lk.8:4-15).
(i) Metsü lenmang tezü nung tsükba, tetezü, “Tsüngrem oji angar saka angashibatemji mojingi bener oadoker.” (Lk.8:12).
(ii) Metsü lung manung tsükba, tetezüji, “Tsüngrem oji angashir pela-a agizüker ajisüaka tera mali nung tatitang nung tsüker.”(Lk.8:13)
(iii) Metsü ai rongnung tsükba, tetezüji, ” Parnoki Tsüngrem Oji angashir; saka shisabuluba,
rongsen, shi taküm tepela agi moksepdaktsür.” (Lk.8:14).
(iv) Metsü ali tajung nung tsükba, tetezüji, “Tsüngrem oji angashir aji akanga amet aser taremzük nung süngjang tajung atanger.” Tsüngrem O angabatem telok pezü rongnung na koba nung aten shisadangang ?.
(3) Tsüngrem Oi ashir, ne taküm nung temenen kar danga lira nangzükang:-
Lai :(Yak.1:21) “Anungji nenok memerükba ajak aser tamajung moshia aliba endoker,
amenoker meidaktsüba Tsüngrem O kobai nenok kümzüktsü akok aji ajemalua agizükang.”
(4) Nai kechi Tsüngrem O angashir ne mulung nung tenoka yuang:-
Lai: (Ibri. 2:1) “Anungji item Tsüngrem O ochiba O nungi asenok oner maotsüsa asenoki tangashiba O nung tali temulung agütsütsüla.”
(5) Nai Tsüngrem O angshiba ama inyakang:-
(a) “Saka nenok pei sasa külakokja lir, Tsüngrem o tangashir dang mekümi teinyaker kümang.”
(Yak.1:22)
(b) “Shibai chichiba Tsüngrem ozüng, nüji ozüng repranger, aser maneni inyaker aser angashir amaba dang masü, saka mapa inyaker akümer, Iba nisung pai inyakba nung moatsütsü.”
(Yak.1:25).
6. Tsüngrem o koda azüngtsü?:-
(a) “Shibai iba Tsüngrem O züngdangdir aser zülua alibatem benshidir, parnok tepelatsü; kechiyong mapangji anasa lir.” (J.Adok.1:3).
(b) “Tsüngrem Oji pa den ayutsü aser Kibuba pa Tsüngrem tsübutsü, aser iba telatet Tsüngrem Oji benshitsü aser kümdanga inyaktsü asoshi pai Tsüngrem oji, pa taküm tepiyong azüngtsüla.” (Tazüng.17:18). Tsüngrem Oji mezüdoki anogo shia aser taküm peyong azüngtsüla.
7. Tsüngrem O koda bushitsü?:-
Lai: (T.Mapa.17:11) “Tesalonikia nung alirtem dang nungi Berea nung alirtem tajungba liasü, kechiaser parnoki kanga jangrabangra mulungso agi Oji agizük, aser itemji shitak asü masü ta anogoshia Laishiba nungi bushi.”
Arogo nung mapang shia, Lai bushiba aser Tanela sentong tajung balala agiaka, khen dang sürbo nübortem tanela nung azüla-a doker ya koda asü? Kuli kabo Tsüngrem O angashiba aser angazükba ama temulung nung mayur, mebushiba ajanga lir. Pauli, “Tesalonikia nunger-dangbo Berea nung alirtem tajungba” ta ashiba ama, tang nungibo Berea Arogopur ama asen Ao Arogopura, mulungso agi Tsüngrem Oji agizükdi, aser itemji shitak asü masü ta anogo shia Laishiba nungi bushidi arung.
8. Tsüngrem O koda temulung nung ayutsü, aser Tsüngrem O temulung nung ayuba tajangzük:-
(a) “Tsüngrem Oi melabatem benshiang aser taküm liang aser kü ozüng ne nükjidong ama yuang.” (A.Shin.7:2)
(b) “Tsüngrem O ne temeyong nung msülokang, Itemji ne mulung lungpak nung züluokang.” (A.Shin.7:3).
(c) Iba yagi na mojing tatitang nungi jenbutsü nung yarir.
(d) Yisu mojingi atitangba aser Tsüngrem O nungi mojing maksüdaktsüba:-
(i) “Tsüngrem O nung ya zülua lir, nisungi am tesa agi taküm malir saka Tsüngrem O agiang taküm alir.” (Lk.4:4)
(ii) “Tsüngrem O nung ya zülua lir, nai Kibuba ne Tsüngrem külemang, aser Pa kija dang nai tenzükang.” (Lk.4:8).
(iii) “Tsüngrem Oi ya ashir, “Nai Kibuba ne Tsüngrem tatitang.” (Lk.4:12).
(e) Tsüngrem O metetba ajanga nisung kati shisa-kaa telemtetba agiteter.
(f) Ali shi aser tanela anaprongla tashi meti alidang Tsüngrem Oi tashi tasen agütsür.
Lai: (Isa.4:31) “Shibai Kibuba dang ata-a alir, parnok tashi tasen angutsü; mongzütem ama tashikang agi atutsü, parnok asemtsü, aser aniseta malitsü parnok jajatsü aser melulatsü.”
(g) Jashiseta alidang Tsüngrem oi süneptsür.
Lai: (Yeremia.15:16) “Ne Otem ngua ni itemji achi, aser ne Otem ni asoshi tepelatsü aser kü mulung asoshi jangratemtsü aküm.”
(h) Mamangertem dang kuli asüba nung Tsüngrem Oi yarir.
Lai: (1Pet.3:15). “Saka Khrista Kibuba ta nenok mulung nung meshiteta yuang aser nenok temulung nung aliba teimla indang nisung shibai asüngdanger, pa dang nenok pei meten langzütsü teti renema liang. Saka ajemaluba aser akhümtsübuba agi aji inyakang.”
9. Otem: Tsüngrem O jangra-a azüngtsü, senaketa angatsü, aser angatettsü merangdi. Tsüngrem O anogoshia aser taküm piyong azüngtsü aser Tsüngrem Oji rongsen ama asen mulung nung rezünga yur iba nem asen taküm anidakja teraksa yanglushiba nung shilem agitsü ajungshir. Nai Tsüngrem O mezüngi lira asen Arogo Omen mapa agi atalokdakja zünga tenzükangma.