Osangtajung Ao Ken Kaket Metongshitsürtem Pusema Ibai Shiner

– Rev. S. Temjen Longkumer, Chumkedima.
Former Litrature Secretary, ABAM.

Ao Ken Kaket tajungba küma yanglushir adoktsü merangdang, ano temetongshitsü timba timba ta ajitetba indang mapang shia Osang Kaket nung angur. Anungji taoba mapang Ao Ken kaket yanglushiba mapa ya tamburtemi koma inyaka aru, aji tanü lanur ken meteter aser Ao ken Kaket yanglushiba komiti nem tera metetdaktsüner.
Küm 25 dak tema süiogo, ABAM-i Ao Ken Kaket yanglushitsü komiti ka shim. ABAM Literature Secretary convener ser ken meteter par 4, ajak agi nisung 5. Iba komiti ya 1986-1988, küm 3 tashi, küm shi 3ben, 4ben tashi Impur nung sentep. Komiti sentep shia anogo 2nü mesüra 3nü anogo toklanga among. Aser anogo ka nung Ken kwika yanglushi, itemji aonung 6 ako nungi 10 ako tashi ken parts tabensa nung ola adoka tendanga liasü. (Iba mapang light ano maru asüji patromax milen tsükloker amen).
Komiti-i takok tashi Original Note nung tetezü aser kensü shitaktibaji bushia meyipzük. Ano mapa talila kaji Aor ajungai temulung asütsü mechi 1988 küm Osangtajung Ken Kaket ajonga Cyclostyle yanglur Ao Arogo ajak dangi yok. Arogotem nungi ken teyanglushitsü kechisa bushitet, aji ken yanglushiba komiti dangi aru. Item ajakji kanga junga, kümdanga mapang agia repranger ken kaketji adok.
Iba ken kaketji size tila ka, ken ajak agi 417 keter koba 1990 küm adok iba to lir. iba ken kaketji küm 10 (ter) tashi maneni Ao Arogotem nung amshia arudang temulung masüba ola kecha mangashi. Iba Ken Kaket nungji Staff-Notation enoker adok asübo koda tajung süla ta bilemogo, kechiaser iba nükjidong nungji komiti-i major revision agia inyaka yutsü.
Saka küm 10 (ter) sülen ken komiti kati iba ken kaket nungi ken kar endok aser tasen kar enoksem aser Staff-Notation nung mezüngbuba 2002 küm adok. Iba anogo nungjagi tenzüka tanü tashi Ao ken kaket kwiben yanglushir adoker, tali tali ang temulung masüba ola angashir. Kodangang Ao ken kaket tashishitsü maket adoktsüar shingaia ashitsü makok. Asenoki tesüleni ken meyipa orr 1990 nung adokba Ao ken kaket nung to Staff-Notation enoker adok nunga jungdisü ta bilema arur.
Ken ya literature nung shilem ka lir. Anungji aibelen malitsü atema iba mapa nung mapang peria agia kanga kümdanga aser nendaknendaka inyaktsü nüngdaker.