Oshi kaji arok meyong lir, aser iba ya taküm aliba tongshi ka mesüka lir

– R.Imkong Lkr, 4th Mile, Diphupar: Dimapur.

Oshi kaji lokdi ka meyong lir, saka ibai nisung kati puratetba “o” oshi ka masü, aser ibai akhi lipok oshi ka masü, aser ibai akhi lipok mapang nungi jembia amshia belentepa aruba süngzü “rope” ka mesüka lir, koba ajanga nisung o nisung na tsüngda nung sentaktepa kümdaktsür aser sobalibaa oteter. Anungji oshi kaji Tsüngremi agütsüba sempet ajak rongnung tulutiba lir ta metetdi. Oshi ka jembitetba aser metetbaji atamata sempet ka ta mebilemtsüla, kechiyong oshi ka metetbaji Tsüngrem nungi anguba sempet tulu rongnung ka lir. Nisung karibo mapang tatsüka tsüngda nung tangar oshi ana, asem tashi-a angazüka jembiteter, saka nisung karibo küm metsü mesüra semer tashi nunga tangar oshi kata mangazükteter; aser kari ashir, paibo mesüra laibo tangar oshi ka mela melaa, züpazüpaa angazükteter mesüra jembiteter ta jembir. Ya tanga kecha masü saka Tsüngrem nungi anguba sempet ta angatetdi. Temeshi laishiba Lipok tapu 11:7 nungi 9 tashi nungji shia aliba ama Tsüngremi oshi tapu aika adokdaktsü aser parnok nisung o nisung na tsüngda nung o mangatetep adok aser alima balala nung soyapokya sobalibaa aoba angur. Ni bilem nung, iba mapang nungji asen Aor tema oshi balala jembirtem rongnungji densema liasü südi tasa bilemdanger. Kechiyong, oshi ka jembiba dakji ajemdaker kin ka ta jateter aser kin shiaji libaliro yimyatsüya terara balala lir. Yamaji tanga limatemji khen doktsür asen Naga lima nunga kin 16 “terser trok” zükpanga alibaji peisasa kin kin lemsanüba agi lemsaba masü, saka mezüngyongi Tsüngremi lateta lemsaa doktsübatem lir ta angatettsüla. Kechiyong oshi ka jembibaji Tsüngrem nungi lir, aser nisungtemi Tsüngrem anema apusoba ajanga nisungtem tsüngda nung mangatetep adokdaktsü aser oshi balala jembiba shiaji kin balala kümdaktsü. Yamaji asen Naga lima yagi tatishitsü tajung ka sayur.
Yangi asen Ao oshi nunga Jungli aser Mongsen oshi ana lir, saka kaket nung zulubabo Jungli oshi agi tang zulutsüsa akümba yaa Tsüngrem nungi lir ta angatettsüla. Aser ano Mongsener kari Jungli o ya junga mejembiteter ta ashir, yamai ashir, “Ni-na jungli ayu arua mesangajeter” ta Mongsener kari ashir. Saka kodang Tsüngrem dang sarasademdir item tu agi tanurtemi sangro kanga junga züngtetba amatu jangratemtsüka sarasademteter, oda ashitsü agi “sten gun” aser L.M.G katoker amai “merangpong” katoker ama tesüngmangtsüka sarasademteter, aser item sarasademji junglirtemi madoksar. Ya kechiba ta süra, ibaia Tsüngrem nungi anguba telong nungi adokba oshi jembir ta angatetdi.
Tanapuba nung ni yangi kü tangatetba ojang asem tatishitsü bener arua sayuner 1) Tsürenseta “Tsüremseta” (2) Renti “Inti” aser (3) Lapoktsü “semzüktsü” item ojang asem ya khen shisadanga bilemdangdi arung.
Mezüngpuba nung Tir Yimyim adok Vol. XV NO. 001, Monday October 9th 2017, yimobilem nung “Anogoshi yimyim” ta ser agütsüba nung tu olen ka nung “Tsürenseta” ta zulua angudang, iba ojang ya Ao oshi shidakba zulutsüogo ta pelaseta züngogo. Kechiyong ta süra otsü olem zulur aikati olen kar zuludang “Tsüremseta” tasa zulua angur, anungji iba ojang “Tsürenseta” aser “Tsüremseta” ana ya khen jangja jangja rasaa shiner. Kechi oshisa zuludir zuluaka ojang kaji tetezü keta aliba o asünungji, koba ojang zülur, ibaji tetezü junga agütsütettsüla aser ojang mesüra olong tetezüji junga magütsütetra iba ojangji pai mesüra lai yangluba ojang ka asütsü aser tetezüji agüjaka, loktii iba tetezüji magizüktetra nüburtemi iba ojangji mesüra olongji amshia moutettsü ta olen ka shitsür. Yangi kü tangatetba olen ka shiner, kodang “tsüremseta” ta shidir tzü aremba ta angatettsü akok. Saka kodang “Tsürenseta” ta südir, tera arendaka, tsübuseta ta shinerba ta tetezüji agütsür.
Tanapuba nung kari telok “Inti” amongtsü ta amshir mesüra ajar, iba “Inti” ta ajaba tetezüji kanga jungabo mangateter. Saka kodang “Renti” ta südir telok tulu songjem ren ta tetezüji agütsür, kechiyong iba ojang ya lokdiren mapa nungang amshir, aser taküma 2017 Khristmas “Renti-nüji telok ajak chiyungba mapang alitsü ta sentong renem dang enoksemer, aser ano tali jangjatsü mechi nung iba ojang ya telok tulu ren mesüra songjen ren amala nungji amshir, aser Renti nü taa ajar.
Tasembuba nung, tenla ki tasenba tu mesüra school ki tasenba tu tanü lapoker ta kodang shidir nüburtem ajaki iba ojangji mesüra olongji junga angateter. Saka kodang tenlaki tasenba tu mesüra school ki tasenba tu tanü semzüker ta shidir tetezüjibo shidak süaka tangatsüji kangabo jangramatem angashir. Anungji nüburtem timbakati iba ojangji junga mangateter ta shira, iba ojangji mamshi tajungba asütsü. kechiyong asenok nüburtem ya “Democracy” lima ka nung aliba nüburtem lir. Aser ano ibala mesükba ojangtem kwika amshidir mesüra zulutsüsa kümdir, oda telok tulubai item ojangtemji mesapura itemji mamshi tajungba asütsü ta nibo aiben shisadanga bilemdanger. Aser ni bilembaji junger ta telok tuluba aser teimba kati angatetra, tang nungi mapa küma aotsübaji tetenzük ser yanglushiyonga odi ta ayongzüker.
Oshi kaji nübur meyong lir, aser koba oshi, olong aser ojangtemsa telok tuluba teimba kati agizükteta jembidir, iba oshiji kin ka oshi akümer. Saka koba oshisa kanga ishiba nüburtem kari jembidir tarutsü mapangtem nung iba oshiji samaa aotsü anasa lir ta rajemtsüla. Kanga pelar.