Ozüngi noktanga aliba teloktem den CMO tesentaktep mali

Kohima, Tsüklai 13 (TYO): Ozüngi noktanga aliba teloktem den aser talisa tashiyim agi sen saruba onük den Nagaland Chief Minister’s Office (CMO) sendaktepa mali ta Chief Minister T R Zeliang-i ashi.
National Investigation Agency (NIA)-i yashi CMO ketdangser asem dang asüngdangya asütsü jaokba atema osangbenertemi asüngdangdang, “Iba ya onük tasen ka masü kechiyong yaküm-a NIA-i parnok jaok saka Chiteni-Luroi nung ken o ji agien, saka tang ano NIA-i tanaben iba ken o kakteter” ta TR Zeliang-i langzü.
“CMO ketdangsertem aotsü aser osang metetdaktsütsü. NSCN(K) ya ozüngi noktangba telok ka lir aser Nagaland nung NIA-i parnok nem senotsü agütsü lir asü mali ta asüba bushisüngdanger. Kari parnok nem agütsüa lira ibaji ozüng alema inyakba mapa ka lir saka CMO-i NSCN(K) mesüra tanga telok shinga dena inyaksema mali” ta paisa metetdaktsü.
Yaküm Yimpoksüi 21 nü state sorkar ketdangsertemi Nagaland nungi NIA meyipa yoktsü atema takhangba agütsüba atema state sorkari mapa inyakba osang metetdaktsüdang, “Parnoki lungkak ait aser parnok dak tim masüba mapa inyakogo ta tezüluba nung agütsü. Onoki iba osangji Union Home Minister dang sangoktsü aser NIA-i parnok nem lemzüktsüba mapa dang inyaktsüla ta ashi aser parnoki yamaji inyaktsü imlar” ta TR Zeliang-isa shisem.
Tsüklai 15, 2018 nü OSD to CM Ruokuovizo Chupuo aser Media Officer ana- Karaiba Chawang aser Kueiherang nungertem NIA Deputy Superintendent of Police and Chief Investigating Officer, Jasveer Singh dangi arutsü metetdaktsü ta yashi NIA osang ka ajanga metetdaktsü.
NIA-i 2016 nungi Nagaland nung ozüng alema sen saruba inyakyim bushisüngdanga arur aser NIA osang ajanga ashiba agi taitsü aketba kulikakettem nung CMO nungi ketdangser asemi shilem agiba puteta lir.