Pak army HQ aser sepaitem tangatetba balala lir: Indian DGMO

New Delhi, November 18 (Agencies): Honibarnü Indian Director General of Military Operations (DGMO)-i, Pakistan army headquarters aser Line of Control (LoC) nung aliba Pakistan sepaitem na tsüngda tangatetba balala nung inyaker, ta ashi.
Indian Army DGMO-i Pakistan army ketdangsertem dang Jammu & Kashmir nung aliba Line of Control nung tesünep alitsü atema inyakang, ta ashi.
Pakistan-i ayongzükba senden ka nung jembidang Indian Director General of Military Operations (DGMO), Lt General AK Bhatt-i Pakistan army General Headquarters-i yimjung aginer, ajisüaka LoC nung aliba Pakistani sepaitemi ceasefire ozüng alema injang sashia yoker, ta ashi.
Paisa Pakistan DGMO Major General Sahir Shamshad Mirza dang, India aser Pakistan na arrtsülen yimjung aser tesünep alitsü atema Pakistan army headquarters aser LoC nung aliba Pakistan sepaitem na tsüngda iba atemaji inyaktsü mepishi.
Pakistan-i, Indian security sepaitemi injang sashia yoker aser LoC nung aliba Civilian anema inyaker, ta aitsüba sülen ibaji langzüdang Indian sepai ketdangseri iba oji jembia langzüka liasü.
General Bhatt-i, Indian sepaitemi injang yokbaji, Pakistan sepaitemi ceasefire ozüng alema injang yokba meyiptsüba dang lir, iba den külemi India nunger sepaitemibo civilian anema meinyaker, ta ashi.