Pak Ato Kilonser, Sharif-i Malala den Oslo nung ajuruteper

Pakistan Ato Kilonser, Nawaz Sharif aser Nobel Peace Prize agizükla, Malala Yousafzai nati Norway kübok Oslo yimti nung tanü Bodbar nü ajurutepa senden ka amenba noksa nung angur. (Oslo, July 08)

Oslo, July 08 (Agencies): Pakistan Ato Kilonser, Nawaz Sharif-i Nobel Peace Prize agizüker, Malala Yousafzai den Norway yimtiba, Oslo nung tanü Bodbar nü ajurutepogo.

Tanü Oslo nung ayongba United Nations (UN) education summit senden nung tenapronglai shilem agiba sülen Sharif o Malala nati tan mezüngsüa ajurutepba osang jangjaogo.

Taoba mapang, October 2012 nung Taliban telungpurtemi injang agi kasettsü merangba Pakistan tsür, arishi küm 17 tain Malala-i lar Pakistan tanaben semdangtsü lemtetra, Pakistan sorkari la den yariteptsü melunga aliba osang ka Sharif-i tanü lemsatepa liasü.

“Ner linük, Pakistan-i na nungita yaritsü asoshi teti melunga lir ta ozü lenisangi kü dang metetdaktsü aser nia Pakistan tsür ka asü nung ozü linüki tanaben shilanga idakji alirtem den yariteptsüji kü khuret ta lemsatepogo,” ta Malala-i metetdaktsü.

“Ni ozü Pakistan tanaben semdangra, iba sentongji school tanurtem ajunga sodi asüba mapang ka nung agitsü,” ta lai ashi.

Sharif aser Malala nati tanü ajurutepdang Pakistan nung kaketshisatsü bushitsü tentetbaren, tila tanurtem nem mapa inyakdaktsüba aser tila tanur lia kibong kümdaktsüba den sentakba tongtipang onüktem benoka jembiba osanga jangjaogo.

Sharif aser Malala nati 2013 küm September ita ayonga amenba UN General Assembly senden tezülen ken ajurutepa liasü saka tenati tan ang chijiba sendenbo amener lir.

Oslo nung anogo 2 agia amentsü ayongba Oslo Summit on Education for Development nung shilem agitsü asoshi Sharif aser Malala nati tang Oslo semdanga aliba osang jangjaogo.