Pak den tesentaktep ajungtsü asoshi Modi-i merangogo: Pak

Islamabad, July 11 (Agencies): India Ato kilonser Narendra Modi-i Pakisatan den tesentaktep tajungba akümtsü asoshi merangogo, ta Pakistan nung tongti osangkaket ka ajanga ashi.

Hokolbar nü Russia, Ufa nung Pakistan Ato kilonser Nawaz Sharif aser Modi na ajurutepa senden amenba sülen tanü Pakistan nunger osangkaket Dawn ajanga, “India-Pakistan tesentaktep ajungtsüji lennirtemi meranga inyakba dak keta lir,” ta ashi.

Dawn osangkaket yimobilem nung, “Sharif ji tejangja, ajisüaka tesentaktep tajungba akümtsü asoshi tanga tentettem, talisa army tem melung koktettsü asoshi (pai) inyakteta mali. Ano külen tesentaktep tajungba akümtsü asoshi Modi-ibo atangji nung inyakogo,” ta ashi.

Kasa osangkaket ajanga, linük anapronglai alima dang kuliküptok ken o jembia sayüba dang masü saka atangji nung mapa agi inyaka sayutsüla, ta ashi.

Hokolbar nü Modi aser Sharif na senden amenba mapang India aser Pakistan na tanaben asüngsashir ken o maneni jembitsü, aser Mumbai bomb lendong ken o tekaraba nung tembangtsü asoshi lenmang bushitsü melungtepba dak sentakba nung kasa osangkaket yimobilem ajanga, “(Hokolbar nü senden ajanga) telemtetba tajung aika agiogo, aser tesem nung tensa majungba aser tesentaktep mejungi aliba mapang ka nung ibaji nüngdaka lir,” ta ashi.

“Sangküm Islamabad nung SAARC senden nung adentsü asoshi Pakistan Ato kilonseri jaokba aser Modi-i ibaji agizükba nung tongtibangsüa rangloktsü, aser pai semdangtsü alibaji atangji nung atalokra ibaji temaitsü tajung ka asütsü, kechiyong Modi-i melenzüksang Manmohan Singh-ibo pa küm 10 Ato kilonser inyakdang mesemdangtet,” ta kasa osangkaket ajanga ashi.

“Semdangtsü alibaji atangji nung ataloktsü ta amangtsüsa kuli lir, kechiyong Modi-i tesem nung tesentaktep asoshi inyakogo, talisa saarc linüktem den inyakogo,” ta parnokisa ashi.

You must be logged in to post a comment Login