Pak-i kiralongra ya linük hadir ka ama amshir: India

New Delhi/New York, September 09 (Agencies): Hokolbarnü United Nation indang ‘Culture of Peace’ onük nung o toktepba sentong nung shilem agia jembidang India-i, Pakistan nung kiralongrar teloktem jenoka lidaktsüba atema tebilemtsü akar, aser Pakistani kiralongra ya linük hadir ka ama amshir, ta aitsü.
New York nung amenoka aliba Permanent Mission of India to the United Nations Minister, S. Srinivas-i, “Ni ozü kidanger (Pakistan) dang, Jammu & Kashmir ji India shilem ka liasü aser yamajisa asütsü ta nenshia metetdaktsür. Joko Pakistan-i ibaji agizüktettsü mapang tongogo,” ta ashi.
Paisa, “Yimjung sobaliba ajanga yimjung temaitsü dang sayur masü saka kidang kiyonger linüktem tsüngda akhümtsübutepa aser kati ka indang linük nung mejangjongba temaitsü sayur. Ozü kidanger Pakistan-i kiralongrar teloktem jenokdaktsüba aser linük hardir ka ama kiralongra amshibaji ajaki junga meteta lir. Parnoki iba sabang ajanga India litsü anema inyaker,” ta ashi.
Srinivas-isa, “Democracy linük ka ama India-i nüburtem melungba inyaktsü aser kiralongrar nem samadaktsütsü atema memelatsü. Gandhi taküm ajanga sayuba- merarai yimjung atema inyaktsü atema onoki meranger,” ta ashi.
“Meimchir alipokli nungi putiotsü nung rara aika raraogo, aser aso 21buba nung yimjung aser tesünep alitsü atema UN-i lenmang sayua mapa aika inyakogo,” ta paisa ashi.
India ya alima nung civilisations tejentiba rongnung densema lir, ta shia Srinivas-i, iba linük nung tamangba yimsü tesayur aser shisashir aika adoka yimjung atema osang prokogo, ta metetdaktsü.