Pak o Afghan nati amaliteptsü ajungshir: US

Washington, August 11 (Agencies): Pakistan aser Afghanistan nati külemi lungjemer kiralongrar aser telungpurtem anema raratsü tajungshiba olen ka United States-i tanü Mongolbar nü metetdaktsüogo.

“Tawa Taliban teloki Afghanistan nung lendong kanga sashia atalokdaktsüba ajanga par telok o Afghan sorkar na tsüngda tenzükba yimjung nung alitsü sentong nem tetsükdakba bener marutsütsü imlar,” ta shia, Pakistan aser Afghanistan sorkar nati amalitepa kiralongrara aser telungpur teloktem den raratsü olen ka US State Department otongdar, John Kirby-i tanü metetdaktsü.

Tawa Afghanistan nung lendong kanga sashia atalokdaktsüba maparen nung Pakistan-i tongti shilem agi ta aikati jembitsü tenzüka lir saka Taliban teloki Afghanistan nung lendong atalokdaktsüba maparen nung Pakistan-i Taliban telok den yaritepba kuli tejangja nguteta mali ta pai sangoktsü.

“Tawa Kabul yimti nung lendong kanga sashia atalokdaktsüba maparen nung Pakistan-i tongti shilem agiogo,” ta shia Afghanistan Tir, Ashraf Ghani-i Pakistan aitsüba olen ka metetdaktsür ghonda ishika lir külen Kirby-i tanü iba olenji metetdakja liasü.

“Pakistan aser Afghanistan naprongla ajangzüktsü mechi par mitkartemi pei lushi nung telungpurtemi tentetba teseptem makdoktsü ajungshir. Yamaji inyakba ajanga Taliban teloki arrtsü adena amakba lendong atalokdaktsüba maparen ajema kümdaktsütettsü,” ta pai ajungshia ashi.

“Afghanistan aser Taliban telok na tsüngda raratepba anena yimjung tezüngzüktep agiba ajanga par linük nung yimji yimjung tia bener arutsütsüji ozü US tejangraba lir. Aji oda, Afghan sorkar aser Taliban lenirtemi tawa yimjung senden amenbaji tejakleni tongti mera agir ta alimai züngoktsü tenzüka lir,” ta Kirby-i ashi.

Pakistan-i ayonger külen Afghan sorkar ketdangsertem aser Taliban telok lenirtemi taoba July ita 7 nü Pakistan nung amenba yimjung senden nung China aser US ketdangsertemi tetendanger ama shilem agia liasü.

Par telok ana tsüngda maneni yimjung senden taoba July ita 31 nüa amentsü ayonga liasü saka Taliban lenisang, Mullah Omar asüba osang jungkai adokba yong Taliban teloki iba senden nung shilem magitsü lemteta sendenji mementettsüsa aküm.

Ano külen, linük shinga nungi teyari magi Afghanistan sorkar kijai ayonga Taliban telok den tarutsü mapang nung yimjung senden amentsü lemtetba osang ka Tir Ghani-i yashi metetdaktsüogo.

You must be logged in to post a comment Login