Pakistan nung bus ka tsükok; nisung 27 asü, 69 yiru

Lahore, November 09 (Agencies): Pakistan indang Punjab province nung kanga kera aniba bus ka longreni alu aser iba lendong nung nisung 27 taküm sama aser 69 yiru, ta ketdangser ajanga Brehostibarnü ashi.
Nisung 100 dak tali mena aliba bus ya Kohat nungi Raiwind-i aorba liasü aser Kallar Kahar jila nung Bodhbar aonung lendong ya atalok.
“Iba bus nung mena alirtem ya Raiwind-i tamangba yimsü dak sendakba mungdang ka nung adentsü aorba liasü,” ta Saddar Police Station nung Station House Officer, Muhammad Afzal-i ashi.
Yirur alirtem rongnung parnok nisung 13 temang kanga mejungi raksar aliba ajanga Rawalpindi-i bener ao aser tanüngba yirur alirtem ya timba anasa aliba mozüki nung anepaluba mapang ka lir, ta osang ajanga ashi.
Iba bus ya shidak agi Islamabad – Lahore Motorway ajanga Raiwind-i aotsü liasü, saka lenmang tangaleni aotsü melungtet.
“Tzüsü aliba ajanga iba lenmang ya aonung 10:00 ako sülenbo shibanger aser bus nung nisung tali mena aliba dang senchi achir aser iba ajanga bus anisangi Grand Trunk Road ajanga aotsü melungtet,” ta Afzal-i ashi.
“Bus anisangi iba lenmang junga memetet aser bus ya kanga kera ania liasü. Bus ya lisa majung ka ajangba mapang longreni alu,” ta pai-sa ashi.
Iba lendong atalokba osang angashia Punjab Chief Minsiter Shehbaz Sharif-i tejashi lemsatep aser lendong atalokba osang tejangja bushitettsü tetuyuba agütsü.
Iba lendong nung yirur alir nem mozü shidak agüja anepalutsü aser teyari balala agütsütsü asoshi ketdangsertem dang Shehbaz Sharif-i shiogo, ta osang ajanga ashi.
Lenmang nung iba ama lendong atalokba ya Pakistan nung aiben ajurur. Aser item ya yimba gari aniri junga maniba, lenmang majungba aser gari nung timtem aliba ajanga ajurur.
April 2014 nunga Kallar Kahar nung bus ka tsükok aser iba lendong nung nisung 15 taküm sama.