Pakistan nung police-i Khristan tanur ka zükset

Islamabad, October 14 (Agencies): Pakistan nung arishi küm 14 tain tebur tanur ka October 9, 2017 nü zükset. Muslim nunger külem class pur ka den raratepba atema pa tepset.
Arsalan Masih tebu Mushtaq Masih-i ashiba agi, pa jabasoji Jhabran Mandi nung private center ka nung züngya liasü.
Nikongdang 5:00 ako meta Bahu Chowk Police Post nungi Arsalan ji private center nung lia police 7 aru, ta Masih-i osangbener dang ashi.
“Ideal Science Academy nung Arsalan ji tuition tagidak lia Head Constable Imtiaz, Driver Rashid, Constable Arshad aser tanga mejangjatetba police kari ki kakpoka atu aser pa classroom nungi atsüzük.” ta paisa shisem
“Sardar (Billu) ta ser police constable kati ozü jabaso Arsalan sayu aser parnoki pa dak teka, süng aser rifle bong agi azüktsü tenzük” ta tebuisa shisem.
Iba mapang tesayur Farhan Ali-i parnok nokdangtsü merang saka police-i pa nungtok aser pa dak maoktsür pa nokdang. Rashid-i Arsalan indang tekolak nung pistol kati akoh aser pa azü alu. Parnoki pa police indang gari nung aniokdang, pa laoer süchia orr asü. Iba sülen police telok jagi pa indang mang lenmang nung yutsür jena ao” ta Masih-isa metetdaktsü.
Iba mapang nisung aika adenshi saka police-i parnok dang anasa marutsü amokmeren, ta paisa shisem.
Ita pezü tejakdang Arsalan-i par Muslim class pur ka den raratep. Muslim kaketshir jagi pa dang pa Khristan tamangba yimsü tokjang ta shia merenshiba atema Arsalan-i pa dak azük, ta tebuisa osangbener dang ashi.
Masih ya Pakistan nung Presbyterian Church nung züngsem ka lir.
“Ni tawa tuang tena raratepba osangji angashi. Arsalan-i azüksang tebu tanuboji Sardar (Billu) lir aser pa Sheikhupura District police nung constable lir. Billu-i Arsalan sempa aser iba jagi par police medemertem anir arur ozü jabaso zükset” ta Masih-isa shisem.
Iba tatalokba atema Sheikhupura Saddar Police Station nung police tenet anema ken o ka benokogo saka tang tashi police-i parnok mapu lir.