Pakistan nunga ‘Bajrangi Bhaijaan’ film sayatsü

Karachi, July 14 (Agencies) : India nunger superstar Salman Khan’er ‘Bajrangi Bhaijaan’ film otsüji tebur ka India nungi Pakistan-i aoba indang lir aser iba film ya Pakistan nunga sayatsü.

Ajisüaka, Pakistan nungbo iba film nung shilem kar endokba sülen ang sayutsü.

Islamabad aser Karachi nungbo iba film ya censor süogo saka Lahore censor board nungi temelaba angutsü asü masü’ar ano meshiteti lir, ta The Express Tribune ajanga metetdaktsü.

Islamabad aser Karachi nung censor screening ji teti inyaker aser tanga international film ajak iba amai tendanga repranger, ta Eveready Pictures, Satish Anand-i ashi.

“CBFC-i Eid mapang ‘Bajrangi Bhaijaan’ sayatsü melaogo saka shilem kar endoker ang sayutsü tetuyuba agütsü” ta of Pakistan nung Central Board of Film Censors (CBFC) Mobashir Hasan-i ashiba osang The Express Tribune ajanga metetdaktsü.

Kabir Khan-i direct asüba film nung Hindu nunger tebur kati Pakistan tsür narongjaker aser temeli tatsük ka lar linüki anir aoer.

Film nung Salman Khan den külemi Kareena Kapoor Khan aser Nawazuddin Siddiqui natia shilem agir aser July 18 nü Eid mamongdang sayatsü sentong lir.

Indo-Pak indang otsü nung ajemdaker yangluba India nunger film tem – ‘Baby’, ‘Ek Tha Tiger’ aser ‘Agent Vinod’ nungertembo Pakistan nung mokdang.