Paris train station telunglen WWII bunker lir

Paris, Tsüklai 03 (Agencies) : Paris yimti nung Gare de l’Est railway station telunglen World War II mapang amshiba bunker ka tanü tashi mesamadaktsüi kümzüka lir.
Iba ya mezüngbo alima rara tanabuba meraradang küm ishika tejaklen osettsüset nangdena ayutsü atema yanglu saka rara tenzükba sülen ali telung nung bunker ka küma yanglu.
French railway historian Clive Lamming-i ashiba agi, 1939 küm iba bunkerji ‘tsükchirtemi tayimtsü nungi amak ka asünunga atsükoktsü’ atema yanglu; ibaji ajanga staff-i train-temji Germany tsütsü anüdoklen tsütsüi jajadaktsü.
Lungru agi mopung maidaktsütsüsa yanglua aliba aser kishi melem-melema alibaji adena iba AFP osangzülur anir aoba mapang paisa ashiba agi, “Onoki kanga tsübuseta bilembaji gas liasü.”
“Alima rara mezüngbuba mapang telungi mopung maidaktsüba tesem nüngdakbaji onoki bilemtet,” ta paisa olen ka shisem.
Square-metre 120 telungzük nung yangluba bunker azüklenji (ceiling) feet ter melema lungru agi yanglua lir; nisung 70 bosa idakji aliba taktang tilala nung atsükoktettsüa ibai yanglu.
Aji oda süaka, iba bunker ya aibenbo mamshi kechiaser tia junga WW II mapang Paris yimti nung anünglen nungi amakbabo kanga buluabo matalok; anungji mim aketba gas tebilemtsü kangabo maliasü.
1940 küm France nunger tamakok anguba aser Nazi nungertemi atsüngdokba sülen iba bunker ya German nungeri tamshiner nem amshidaktsütsü temelaba agütsü.
Tejen kümer süaka alima rara tanabuba mapang inyakba tsüngsüji tang tashi karbo lir aser item rongnung “Notausgang” (emergency exit) ta sign ka zülua aliba ano mesamai lir.