Parliament nung Land Bill agizüktsü memelatsü: Rahul

 Jaipur/Rajasthan, July 17 (Agencies): Ato kilonser Narendra Modi aija tanü Congress tatong Tir Rahul Gandhi-i, taruba Parliament senden nung Land Bill benokra par party-i ibaji agizüktsü asoshi memelatsü, ta ashi.

Modi aitsüba olen nung Rahul-i, ita trok tsüngda nüburtemi pa indang teku tasazük inch 56 jagi inch 5.6 tashi ajema kümtsütsü ta ashiba den külemi Rajasthan nung Vasundhara Raje’er sorkar aija iba ya “Lalit Modi’er sorkar lir” ta ashi.

Taruba hopta Parliament senden tenzükba mapang sorkari land bill benoktsü tebilemba lir, aser iba dak sentakba nung Congress tatong Tir Rahul-i item o jembiogo.

Jaipur nung party nung inyakertem den jembidang Rahul-i Parliament nung Land bill agizüktsü memelatsü ta nangzükogo.

“Tang mezüngsüa sorkar kati opposition yarir. Koba mapang nungsa maongka ngudir sorkari Congress yarir. Aluyimertem onük nung parnoki ozüng ka asemben tashi benokogo. Parliament nung land bill agizüktsüji onoki memelatsü. Ali inch kata magütsütsü,” ta Rahul Gandhi-i ashi.

Lok Sabha election mapang nung Ato kilonser Modi-i teku tasazük inch 56 inch indang jembiba o nung ajemdaker Rahul-i, Ita trok nung teku tasazük inch 56 ji inch 5.6 akümtsü. Aser ibaji shirnoki inch 5.6 kümtsütsü. Congress party den linük nüburtem, aluyimer aser aayangertemi kümtsütsü, nenoki ibaji metettsü,” ta ashi.

Raje aser taoba mapang IPL tongti Lalit Modi na tesentaktep junga aliba dak sentakba nung Rahul-i, Raje’er sorkar ya India nunger nüjiso mangudang British sorkar ama lir, kong sorkar indang remote control ji London nung liasü ta ashi.

“Sorkar indang remote control ji London nung aliba ama iba sorkar indang kasa remote ji London nung lir. Pai iba nungjagi (Lalit-i London nungi) remote button anemer aser yangi lai (Vasundhara Raje) inyaker,” ta pai ashi.

Ochimashiba sen aika bendena aibelener aser linük nungi jenshia senzür ka Chief Minister Raje-i yariogo, ta Rahul-i aitsü.

“Bendanglen jenshia senzür aibelener ka, ochimashi sen bendener ochimashir ka yariba ajanga lai India nunger temzüng alema inyakogo,” ta Gandhi-i ashi.

“Yangi aliba ya Vasundhara’er sorkar masü saka Lalit Modi’er sorkar lir. Ibaji Rajasthan nung alir ajaki meteta lir, iba ya BJP sorkar mesüra Vasundhara’er sorkar masü, saka Lalit Modi’er sorkar lir,” ta paisa aitsüogo.

Rahul-isa, Ato kilonser-i election mapang nung yazü aika nangzük aser tangbo ochimashi maparen asoshi pai ola madoker, ta ashi.

Bendanglen nungi ochimashiba rongsen meyipa bener arua senso shia account nung sen lakh 15 inoktsütsü ta election mapang Narendra Modi-i nangzükba dak sentakba nung Congress leniri, “Pa (Lalit Modi) London nung sen crore lakh aika yur kazür. Pa meyipa anir arung aser yangi par sorkar agiener nübur sorkar amenokang,” ta ashi.

Ochimashiba maparenji khenyongi magizüktettsü ta Modi-i election mapang nangzüka aliba aitsüba den külemi Rahul-i, “Yimlibilema nangzüka aliba ama inyaka Lalit Modi ji anir arung aser Rajasthan nung par sorkar agienang,” ta ashi.

Congress lenirisa state balala nung BJP sorkartem aija, “Yangi (Rajasthan) Lalit Modi’er sorkar lir, Madhya Pradesh nunger Vyapam sorkar lir, Maharashtra nung Munde sorkar lir aser Chhattisgarh nung ‘dhaan’ sorkar lir. Ajisüaka teku tasazük inch 56 keta aliba Ato kilonseri ojang kata madoker,” ta ashi.

Rajasthan sorkari school aser hospital aika shibangtsüogo, Raje’er sorkari school 17,000 shi shibangtsüogo, ta paisa ashi.