Party temi yimtenren tsütsü raraba anentsüla: Venkaiah Naidu

Kozhikode, Tsüklai 17 (Agencies): Tanü linük tatong Tir, M Venkaiah Naidu-i Kerala nung aliba party ajak dang yimtenren dak sendakba nung raraba anentsüla, ta ayongzük.
Tanü Kozhikode (Kerala) nung Naidu-i, “Yimjung ali nungang linük ka tejakleni aoer aser terenlok alir. Terenlok aser yimtenren tsütsü nisung tepsetba naji kodanga külemi moutettsü. Yimtenren tsütsü toktepbaji injang ajanga masütsüla, kechiyong vote dak tashi tuluba lir. Anungji ni Kerala nung alirtem dang yimtenren tsütsü raraba anentsü mepishir,” ta mepishia metetdaktsü.
Kerala Chief Minister Pinarayi Vijayan aliba district, Kannur nung tawa yimtenren dak sendakba nung nisung 22buba tepsetba sülen tatong Tiri iba o ya jembiogo.
Ita 20 tejaklen Vijayan-i Chief Minister mapa atema tenangzükba agia liasü.
Tentonü (Hombar) Congress nung inyaker arishi 30 lanur ka tepseta liasü, aser paji Communist Party of India-Marxist nung inyakertemi tepset südi ta melung malemer.
“Yimtenren lenirtemi tsükchirtem ama meinyaktsüla, ajisüaka peipei tangatetba nung ajemdaker inyaktsüla. Kin, tamangba yimsü, politics aser oshiopen balala asutsüa akok, ajisüaka asenok ajak India nunger,” ta paisa ashi.

You must be logged in to post a comment Login