Patty Jenkins-i ‘Wonder Woman’ sequel yanglutsü

September 13, 2017 (Agencies): Patty Jenkins-i ‘Wonder Woman’ indang sequel direct asütsü molungogo.
Film yanglur arishi küm 46 tain, Jenkins-i taküm kanga nüngtugu süa nüburtemi kanga sabua reprangba ‘Wonder Woman’ film ya direct asü aser mapang talanga jembishinüa aruba sülen lai anu iba film indang part tali yanglutsü molungogo.
Iba film nung Israel tsür Gal Gadot-i tongti shilem agia lir.
Patty-i iba film indang otsü zülua direct asüba nungi sen million $8 aazüktsü lir aser iba ajanga la ya tetsürtem film director rongnungi sen timtiba aazüker akümtsü.
Osang ka ajanga ashiba agi iba box office nung iba film nungi aazükba nungi la nem shilem ka agütsütsü.
‘Wonder Woman’ film nüburtemi kanga sabua reprangba ajanga la kanga aoksa, ta tai ashiba sülen lai anu iba film ya tasen yanglutsü südi, ta nisung aikati bilema liasü.
Iba film nung ajemdaker nüburtemi tajung aser tamajung ajitettsü südi, ta lai bilem, saka iba super hero film nung nüburtemi tajung dang ajitet.
“Iba movie sayaba mapang nüburtemi telangzüba temeyoktep nung agütsütsü südi, ta ni bilema liasü,” ta lai ashi.
‘Wonder Woman’ film ajanga tetsür tebur tsüngta telemsa aliba indang ken o temai tali adoka jembiba atema pelar, ta Patty-i shisem.
“Nüburtemi iba movie nung tajung ajiteta yariba aser onoki jembinüba ama nüburtemi tanga otsü masü saka iba movie nug aliba indang kisüng jembiba ya tesüngmangtsü lir,” ta lai ashi.