Pei lenmang meyanglutetba nübortem

Joko tang ya August ita amah tashi nung Nagaland ajungalen gari lenmang agi ayong aser awatsüng küma omadagi aser apu kar ponga orr mali aser kar nung gari senzü majung ta kümdagi. Naga lima nung arem, tenem aser ayongtem aliba agi asenoki Naga lima topur tajung ta jembir saka lenmang majungba agi tangar bendanger asen lima topur ajung reprangdangi marudaktsüner. Asen lima nung asenoki inyakba mapatem aika taaktsüka lir saka taaktsü takettibaji gari tajung nung ainer tajung mendaktsür lenmang tamajung nung senzüba mapa ya asütsü. Iba jagi tangar tsüngdang asenok ya yimkong ajungtsü mebilemi pei ajung dang bilemba nübortema ta sayur. Lenmang majung nungji garia teshidok malang melamelaa menener aser teraksaa melamelaa raksar. Aji oda, lenmang majungba agi gari nung jajartem dang nungibo tetsüng agi jajartemang timtatemba atemer. Iba amaji anogo shia lenmang majungba yabo ajaki ajurur asünungji asenok ajaki sorkar, sorkar dang aija aruogo. Iba jagi lenmang ya meyanglushir südi ta bilemer, kechiyong sorkarji minister-temji masü nübortem lir ta tangang rajemer. Aji oda, kodang asenoki lenmang majungba indang sorkar aitsür, ibaji asenoksasa asenok aitsür amato akümer, anungji kongsa teyanglushitsü nüngdaker ibaji asenoki asenoksasa yanglushitsüla. Ibaji tali tajungba nung angatettsü atema kodang lenmang mejunglir, sorkar masü asenok nübortem timatemer aser kodang apu ka raksadir, sorkar masü nübortem timatemer. Tetezü lenmang kiburji nübortem lir. Aji oda, tang Kohima nung Chief minister aser Chief Secretary nati anir yimsüsür aser tulurtem mapa inyakdak Civil secretariat leni aiba lenmang nung apu dena anenzüka bener aoba, Kohima nungi Imphal leni aiba lenmanglen Jakhama anasa lenmang anenzüka aoba, Tuli nung tzüsangra apu ajanga khu abenba gari senzü mejungi akümba, Tuensang District Planning & Development Board senden nung gari lenmang onsara mejungi akümba indang kanga süoki ia jembiba, Tizit nungi Mon tashi lenmang masü ayongküm nung jajar ama gari anitsüsa akümba, Changtongya nungi Longleng tashi lishi agi lenmang mangu akümba, Kohima nungi Doyang apu tashi kibur maliba lenmang nung jajar ama jajaba, Dimapur nungi Jalukie aser Peren leni atuba lenmangbo lenjen amato kümadokba aser Dimapur nung lenmang majungbajibo yutsür joko apu (flyover) tema nung yin (iron) kateta adoka raksayonga aoba mapatem jagi lenmang anepalutsüsa bilemba nübortema mali, anungji sorkar a mali amato küma aoba angur. Asenoki asenok asoshi sorkar sen agi lenmang yanglubaji tangar meyong sen agi tangar asoshi lenmang yanglutsür amai bilemer, anungji mashimashi, apuapua aser akangasünga shitak meyangluyonga kecha jashia mebilemer. Iba sülen kilentzü maliba agi motzü lendi nung ayimyonga, motzü jagi lenmang raksaa yimbokyonga, lenmang lendi mengui arem agi meyibangyonga aser apu raksaa ooya anguyonga, lenmangji asenok meyong masü aser lenmang raksaba jagi asenok kecha timmatemtsü amai bilemer, kecha mejashir, shisamebulur aser tezümatanger, anungji lenmang agi ayonga küma oaka odang timtema arema ola madoki senzür. Item nübortemji taremzük aser nisung tajung purtem asü (?),  matu purtem asütsü ? Lenmang yangluba senji department sen masü aser lenmang yanglurtem meyonga masü saka nübortem meyong sen, anungji nübortemi pei sen agi lenmangji repranga jungjunga yangludaktsütsü tim aser meyanglura kechiba meyanglur ta ola adoktsü tim. Aji oda, kiburi ola madokba agi tangari mezüngmeshir. Sorkarji tangar amato aser nübortemji kibur, anungji kiburi kibur khuret aser shilem memetet tashi tangarba jagibo mesüshitsü, külakoktsütsü aser mezüngmeshitsü. Koba state nungsa nübortemi terenlok mapa kechisarina nung kibur kümküma ola adoka anepaludir, iba state nung lenmanga ajungtsü aser tanga terenlok mapatema shitak inyaktsü. Item statetem rongnungji talangkati bushia maoyonga Manipur state ya ka asütsü. Manipur nungbo nübortem asoshi inyakba mapa tilaka nung danga meshitaki inyakba putetra, tetsür tebur kecha mali, ajaki ola adoktsü aser shitak inyakdaktsütsü. Iba jagi Nagaland adena India len nungi kechisarina bener aoba state süaka, Kohima dang nungi Imphal yimti yimdong noklangben agi tajungba aser Nagaland dang nungi Manipur noklangben agi tajungba renloker. Ibaji nübortemi kibur kümküma pei lima anepaluba ajanga lir.