Pei o agi pei metentsü

Yisui asenok dang amajok o mashi-mashi mejembitsü asoshi ashiba tetsübutsü aser tekümdangtsü o Laishiba nung asenok ajaki angatettsüsa shia lir. Ajisüaka, asenoki aiben iba ama tekümdangtsü o ji tenoktenoka mangar aser magir. Mathi 12: 36 nung ashir, ” … nisungi kechi amajok o sa jembidir, iba o indangji obendangba anogo nung peisasa langzütsü.”  Item amajok otemji kechi agi asenoki tangar jashidaktsür aser kechi agi Tsüngrem mepeladaktsür, item o temji asütsü. Asenoki aiben o kanga mekümdangi jembir aser asen tebang nungi tesempatsü o jenti adoker. Aji oda, asenoki asen jembinütsü jembibaji Tsüngremi kecha mazünger aser mangashir amai bilemer. Ajisüaka, Laishiba nung zülua alibaji shitak süra asen bang nungi adokba amajok o ajakji kenü Kibubai asenok dang asüngdangtsü aser aji asenoki langzütsü. Aji oda, Mathi 12:37 nung ashir, “.. nü o agi na metentsü aser nü o agi na aitsü.” Mathi tapu 15:17-20 tashi nunga Yisui nisung bang nungi aiba ajanga nisung memenener saka kechi tebang nungi adoker ibajiang shitakba nisung mulungjang nungi adoker aser iba jagiang nisung mulung menentsür ta shia lir. Tetezü, aiben asenoki mashi-mashi chiajembaji dang tai aser temenen ta bilemer, saka Yisui ashir, tebang nungi idaktsüba mesüra teka memetsüki chiyongba agi masü saka nisung ka bang agi pa mulungjang nungi adokba o jembiba agiang nisung menentsür. Asenoki asen bang nungi jembiba o agi  tangar menentsüba aser tangar mulung yirutsübaji tema zübo keta yiruba dang nungi tamajungba lir. Tanü asenok loktiliba nung kinünger o kinünger na, kiyonger o kiyonger na, yimer o yimer na aser telok o telok na meputeptetba ajak ya nisung kari pei bang mazüoki temulung nung tamajung bilemba ajunga jembiba ajanga lir. Aji oda, asenok aika o mekümdangi jembiba ajanga aika den mepelatep adoker tesasaba tia nung alitsüa akok. Asenoki aiben tejembitsü maka dang tangar nüngsen jembir, tangar lutsür aser menütsür. Laishibai ashiba amajok otemji itemji lir. Iba ama nüngsen aser o tamajungba jembiba ajanga tejembira kecha majangzüker aser tangashira mepelar. Iba jagiang amajok o ta ajar. Tangar majung jembiba dang nungibo tangar ajung jembiba tajungba, tangar luja jembiba dang nungibo tangar tuja jembiba tajungba aser tangar nüngsen jembiba dang nungibo tangar nüng sanga jembiba tajungba. Asenoki jembiba agi nisung aser Tsüngrem tsüngdang asenoki bilemba shisatsü sayur. Anungji, asenokji nisung tajung asü tamajungar tangari aseni jembiba o nungi bendanger. Yakob-ia tamangertem dang tangashitsü nung karaang saka tejembitsü nungbo meilongi süang ta shia aliba tajungshi  o ka Yakob 1:19 nung shia angur. Asenoki jembiba o agi jashia alir kar mulung süngzüktsütsüla, mangyima alir kar süneptsütsüla, tamakok alirtem nem teimla agütsütsüla, shirangertem aneptsütsüla aser tashimait alirtem ajungshitsüla. Item ama o tajung jembitsü atema asenok nem tebang temeli tenja lir. Aji oda, temulung nung bilembatemji Tsüngremi jembitsü mulunger asü memulunger ta teti sarasadema asüngdanger jembitsüla, kechiyong aseni tanü o ka kazüka yokba jagi tatem anogo nung obendangdak, iba jagi asen metentsü aser asen aitsü ta asenoki metetogo. Anogo shia asenoki jembiba o agi asenoki tangar taküm, kibong aser lokti yanglutsür asü mesüra raksatsür, ibaji tanübo jungjunga bilemdangdi. Efesa 4:29 nung ashir, ” Nenok tebang nungi o tamajung ka danga tadokdaktsü, ajisüaka tangashirtem asoshi taochi angutsüsa kechi tenüngdaktsü lir, aji jembiang.