Petsaprong Küm Ka Süiogo

1990s mapang nung Naga nungeri timtem toushi tensa mapang aika ajangshia aru, iba sülen küm aika tesünep nung lia aruogo, ajisüaka yaküm- 2017 küm tu kanga petsaprongba küm ka, aser nüburtemi ola adokba küm ka liasü, ajisüaka küm tasen kati ayaokdang aika melungjang nung teimla tasen alitsü südi, ajioda taküm küm tenzükba mapang nungi election mopungsem kati asenok menepogo. Yaküm küm tenzükdangyongi nüburtemi ULB election anema longkak ait tenzüka sorkar dang tejashi sayua Civil Secretariat anogo aika shibanga yutsü, ULB election anema longkak aitdang Dimapur nung nisung ana khaset aser Kohima nung sorkar kiojen aika rongdokja liasü. Ano külen 2017 küm ya sorkar anokshiba küm ka aser nüburtemi ola adokba küm ka liasü, ta ashitsü akok. Oda yaküm ACAUT leniba nung aikati sorkar inyakyim nung ochimashi aser meshitaki inyakba anema ola adokba küm ka liasü. Ano 2017 küm tu tzü-metsüngba küm ka, gari lenmangtem raksaba aser aputem chirepba küm ka liasü. 2017 ya NBCC-i anir Clean Election atema kanga meranga inyakba küm ka liasü. Iba dak alia 2017 ya Right to Information (RTI) tashi amshiba küm ka liasü; oda melungtet telok aser nija aikati RTI tashi amshia nüburtemi mejangjai aliba osang aika kaktettsüogo. Item tatalokba aser kuli ajakji ajanga joko nüburtemi tesünep nung linüba, terenlok aginüba aser sorkar nem ochishia inyakdaktsünüba tanela sayur. Oda nisung aika melungjang nung- Naga yimtenren ken o tatem küma latettsü asü? Assembly Election atsülangtsü asü? Election agi ka asünunga Election merüka agitettsü asü? Party tasen kati sorkar akumtsü asü? Tan election nungbo nüburtemi nübur meimba lenirtem nem vote agütsütsü asü? Nagaland nung terenlok alitsü asü? Yaküm dang nungibo taküm tajungba asütsü asü? ta tasüngdangba jenti alitsü südi. Ajioda taoba kümtem dang nungibo taküm küm tajungba asütsü atema asenok teinyaktsü lir, aser ibaji taruba election ajanga metettsü. India sorkari Naga nunger taginüba tekaraba nung ataloktsünüra Naga yimten ken o latettsü asoshi election magii atsülangtsüa akok, ajisüaka kodang südir süaka election agitsü, anungji tan election nungbo asenoki ochi melungsentsü agi election nung shilem agia vote agutsüdi. Yimtenren party koba südir süaka party tangatetba aser nükjidong tejangja lateta lir, aser iba nungji ajemdaker election ‘manifesto’ yanglur, aser nüburtemi manifesto asadanger party shima vote agütsür. Yamaji yimsüsüba menden nung alidang election manifesto nung nangzükba ama inyak asü meinyak? ibaji asadanga asenoki vote agütsüdi; Asen lima nung yimtenren lenirtem reprangdangra party ka nungdanga teret janga aliba lenir aika mangur, saka pei ajung asa-a maongka dang ngura mapangshia party melener aser item ama lenirtemji akhümketa merepranger, tanü ser asüng-a parnoki party melentsü, joko item ama lenirtem nem vote magütsüli; tesüiba küm pongu nung pei constituency nung terenlok mapa junga meinyaktsürtem nembo joko tanaben maongka magutsüli (vote magütsüli); tzükong, yimer, kinünger mesüra medemer apir vote magütsüli; sen yong vote meyokli saka menden 60 prongla nung Tsüngrem tsübuba aser nübur meimba lenirtem shimtetdi. Joko takümbo longkak aitba küm ka masü saka asenoki election merüka agiba süngjang achiba küm ka südaktsüdi.